Let's know the cycle of lifeforce!

 உயிரின் சுழற்சி அறியலாம்!

துரிய தவத்தின் நிலை ஆயிரமிதழ்

தாமரை என்பர் சிறப்பில் முன்னோர் 

மேல்கீழ் நிலை இரண்டுண்டு எனினும்

தவத்தின் காலம் அனுபவம் இணைக்கும்

உயிர்சுழற்சி உச்சியில் உணரக் கூடும்

அதனோடு ஒன்ற உடலும் சுழன்றிடும்

உயிர்த்துகள் சுழற்சி யாரரிவார் இது

உணர்தலாக கிடைத்திடும் துரியம் வழி!

விளக்கம்:

துரியம் என்பதை சுத்திதவம் என்றும் சொல்லுவார்கள். சிறப்புச் சொல்லாக ஆயிரம் இதழ்கொண்ட தாமரை என்றும் வர்ணிப்பார்கள். துரியசக்கரத்தில் மேல் நிலை துரியமாகவும், அடி நிலை மனோண்மனியமாகவும் சொல்லுவதுண்டு. எனினும் விடாமுயற்சியாக, தொடர்ந்து செய்துவர, காலமும் அனுபவமும் கூடக்கூட, மேல்நிலை, அடிநிலை என்ற வேறுபாடுகள் எழாத நிலை கிடைக்கும்.

ஒரு அணுவின் அசைவை யாருமே அனுபவிக்க, உணர முடியாத இந்த அறிவியல் உலகில், நமக்குள்ளாக இயங்கிடும் உயிர்த்துகள்களின் அசைவின் சிறு நிலை அசைவை நாம், இந்த துரிய தவத்தால் உணரமுடியும். அச்சுழற்சி தலைக்குள், இடமிருந்து வலமாக சுழல்வதாக உணர்வோம். மேலும் அச்சுழற்சியில் ஆழ்ந்து சென்றிட, நாம் தவத்தில் அமர்ந்திருக்கும் நிலையில், தலையோடு, உடலின் மேற்பகுதியும் இடவலமாக அசைந்து கொடுப்பதை நாம் உணர முடியும். இதில் நம்முடைய முயற்சி ஏதுமில்லை என்பதை தெளிவாக புரிந்துகொள்ள வேண்டும். எனவே இது அற்புதம் தானே? என்பதாக இந்தக்கவிதை உண்மை விளக்கம் அளிக்கிறது.

வாழ்க வளமுடன்

-----

Present by: