Penance is the way to know the truth!

 தவமே உண்மை அறியும் வழியாகும்!

நம்மை இயக்கிடும் பெரும் சக்தி

இயற்கையே தான் இறை என்றும்

இறையே தான் படைத்தான் அவனே

தினமும் ஆட்டு விக்கிறான் என்றும்

பஞ்சபூதம் முதலாக ஐயறிவு வரை

கடந்து உயர்ந்த ஓர்பிறவி மனிதனே,

உனது குறைபோக்க அவனை போற்று

என்பதில் உண்மையறிய தவமே உதவும்!

விளக்கம்:

இதுவரை நமக்கு தெரிந்த உண்மைகள் என்ன? இயற்கை மிகப்பெரிய சக்தி வாய்ந்தது. இடி, மழை, மின்னல், எரிமலை, பூமியதிர்ச்சி, சூறாவளி, புயல், சுனாமி இப்படியேல்லாம் பொங்கி மனிதனை பழிவாங்கிவிடும். எனவே இயற்கைதான் இறை, கடவுள் என்று பல காலமாக சொல்லிவந்தார்கள். பின்னாளில், கடவுள் எங்கோ வானில் ஏதோ ஓர் இடத்தில் இருக்கிறான். அவன்தான் நம்மையெல்லாம் படைத்தான். ஓவ்வொருவரையும் இப்படி அப்படி என்று இயக்குகிறான். அவனால்தான் நமக்கு இன்பமும், துன்பமும் வருகிறது. அவனே நம்மை பாராட்டுகிறான், தண்டிக்கிறான். கடவுளே பிறக்கவைக்கிறான், நம் உயிரையும் பறித்துக்கொள்கிறான் அதனால் அக்கடவுளை  வணங்கவேண்டும் என்று சொன்னார்கள். அதுதான் இன்னமும் கூட தொடர்கிறது.

மேலும், விண், காற்று, நெருப்பு, நீர், மண் ஆகிய பஞ்ச பௌதீக பிரிவுகளும், தாவரம் முதல் விலங்கினம் வரையும் கடவும் படைத்து, அதனினும் உயர்வாக ஆறாம் அறிவாக மனிதனை படைத்திருக்கிறான். எனவே இந்த உண்மையை அறிந்து, கடவுளை போற்றி புகழ்ந்து அவனை குளிர்விக்க வேண்டும். இல்லையேல் நம்மையும் இந்த உலகையும் தண்டிப்பான் என்று ஒவ்வொரு மதத்தினரும் தங்கள் மதமே சரியான வழி என்றும் கூறி பலவித சிக்கல்களை பிற மனிதர்களுக்கு உண்டாக்குகின்றனர்.

இது உண்மையாகவே சரியானதா? இயற்கை கடவுளா? கடவுள் படைத்தானா? தண்டிக்கிறானா? ஏன் ஆறாவது அறிவாக மனிதன் இருக்கிறான்? பிற உயிர்களெல்லாம் எதன் பொருட்டு இருக்கின்றன? இப்படியான பல கேள்விகளுக்கு விடை அறிவதற்கு, குருவின் உதவியால் கற்றுக்கொண்ட தவமே உதவும் என்ற உண்மையை இந்தக்கவிதை நமக்கு விளக்குகிறது.

வாழ்க வளமுடன்

-----

Present by: