The glory of Shanti Meditation!

 சாந்தி தவத்தின் பெருமை!

சாந்திதவம் யோக உலகில் ஓர்வரம்

அற்புதம் தந்தவர் பரஞ்ஜோதி மகான்

அவரின் வழியே வேதாத்திரி தந்தார்

விபத்தை நோக்கா வாகன வேகமது

குறைத்தாற் போல தவவேகம் தடுத்து

உடல்சக்தி மாற்றல் இதமாய் வந்தது

இனிஏது தடையும் பயமும் யோகத்தில்,

எவருக்கும் பொருத்தாக தவம் ஆயிற்று!

விளக்கம்:

சித்தர்கள் வழியில் குண்டலினி தவம் பலவாறாக பிரிந்து, உலகெங்கும் பரவியது. ஆனால் யோகத்தின் வழியே இறையுணர்ந்தோர் சிலரே. காரணம், நாள்கடந்த தவ ஆற்றல் தேங்கி, வலிமை தாங்கமுடியாமல் பலர் கைவிட்டனர். ஆனால் காலத்தின் மாற்றத்தில், யோகத்தில் கண்ட மறுமலர்ச்சியாக, இறையே தந்த வழியாக, தவ ஆற்றலை குறைத்திடவும் வழி பிறந்தது. அதுவே சாந்தியோகம் அல்லது சாந்திதவம் ஆகும். இதிலும் அந்தக் காலத்தில் சில கடின முறையாகவே செய்துவந்தனர். ஏனென்றால், தவ ஆற்றல், அவ்வளவு சீக்கிரத்தில் மீண்டும் மூலாதரம் கொண்டுவர முடிவதில்லை. 

இதற்கெல்லாம் ஒரு முடிவாக வரமாக, உலக சமாதன நிறுவனத்தை அமைத்த, ஞான வள்ளல், பரஞ்சோதி மகான் அவர்கள், மிக எளிய சாந்தியோகத்தை அமைத்து, எல்லோருக்கும் கற்றுத்தந்தார். அவரின் வழியிலேயே வேதாத்திரி மகரிஷியும் கற்றுத்தேர்ந்து, வேதாத்திரியத்தின் வழியாக தந்தார், இன்றும் அப்படியே கடைபிடிக்கப்படுகிறது.

சாந்தி தவ நிலை என்ன செய்கிறது என்று எளிமையாக சொன்னால், வாகனத்தில், நிறுத்தக் கருவியாக Break Lever இருப்பதுபோல, மிகையான தவ ஆற்றலை வேகம் தடுத்து, உடல் சக்தியாக மாற்றிக்கொள்ள துணை செய்கிறது. யோகத்தில் இதுவரை இருந்த பயம், தயக்கம், குழப்பம் எல்லாவற்றையும் “சாந்தி தவம்” அகற்றிவிட்டது. இனி என்ன? 14 வயது நிரம்பிய எல்லோரும் யோகத்தில் இணைந்து, தவம் கற்கலாம், தடையில்லை என்று இந்தக்கவிதை உண்மை விளக்கம் அளிக்கிறது.

வாழ்க வளமுடன்

-----

Present by: