Know the organs and pleasures of the mind!

மனதின் உணர் கருவியும் இன்பமும் அறிக!

மனமென்ற ஒன்றுதான் உணர்கருவி உயிர்கட்கு!

அவ்வுணர்வு இல்லாரை மிருகமென்று கூறுதல்

தவறேஆம் அவற்றிற்குக்கூட உணர்ச்சி உண்டு

தன்னைப் போல்பிறஉயிரும் என்றபொது உணர்வே

மனிதனுக்கு வேண்டும் அதுவே அவனின் ஆறறிவு!

உடலில் உணர்வு கண்ணில்காட்சி காதில்ஒலிகூட

மூக்கில்நுகர்வு நாக்கில்சுவை மனதின் கருவிஇன்பம்

தேவையளவு முறைஇவை மீறினால் தன்னையிழக்கும்

உறக்கமயக்கம் உடல்மன நோயாகும் விழித்திடுவாய்!

விளக்கம்:

மனதின் வழியாகவே, அதன் உணர்தல் வழியாகவே இவ்வுலக இன்பங்களை உயிர்கள் உணர்கின்றன. “உனக்கு உணர்ச்சியே இல்லையா? நீ என்ன மிருகமா?” என்று சிலர் தன்னிலை மறந்து பிறரை சொல்லுவார்கள். ஆனால் அது தவறான கருத்தாகும். மிருகங்களுக்கும் மனம் உண்டு, உணர்ச்சிகளும் உண்டு. ஒரு மனிதன், தன்னைப்போலவே பிற எல்லா உயிர்களும் என்ற, முழுமையான, பொதுவான உண்மையை உணர்ந்துகொள்பவன். அதுவே ஆறறிவு ஆகும்.

மேலும் உடல், தோல் வழியாக அழுத்தத்தை சுகமாக, வலியாக உணர்வதும், கண்கள் வழியே காட்சியாக பார்ப்பதும், காதின்வழியாக ஒலி, இசையாக கேட்பதும், மூக்கின் வழியே மணமாக (நாற்றமாக) உணர்வது, நாக்கின் வழியே சுவையாக அறிவதும் மனதின் எழுச்சி உணர்வே ஆகும். எனவே மனம் உடல் கருவிகளின் வழியாக ஐந்து உணர்வுகளும், தன்னையே மனமாக உணர்வதுமாக ஆறு உணர்வுகளில் நிலைக்கிறது.

இந்த உணர்வுகளில், இன்பங்களில், தேவை, அளவு, முறை மீறினால், அந்த இன்பமே துன்பமாக மாறி, மனம் தடுமாறிவிடும், தன்னை இழக்கும். மேலும் சக்தி வற்றி தூக்கம் அல்லது மயக்கம் வந்துவிடும். பின்னாளில் அதுவே மன நோயாகவும், உடல் நோயாகவும் மாறி வருத்தம் தரும் எனவே கவனமாக, விழிப்புணர்வோடு இருக்க வேண்டும் என்பதாக இந்தக்கவிதை விளக்கம் தருகிறது.

வாழ்க வளமுடன்.

-----

நன்கொடைகள் (Donate) வழங்க:

GPay: 9442783450@okhdfcbank
WhatsApp: 9442783450.wa.qvi@wahdfcbank
Bhim UPI: 9442783450@upi
PhonePe: 9442783450@ybl

Present by: