You will learn to expand your mind and act!

 மனம் விரிந்து செயலாற்ற பழகுவீர்!

மனமானது தன்னளவில் குறுகிநின்று செயல்பட்டால்

ஓவ்வோர் அனுபவமும் தனித்தனி என்றாகிவிடும்

ஆனால் நிறைமனதும் விரிந்தமனமும் உள்ளோர்க்கு

உலகமக்களின் இன்பங்களும் துன்பங்களும் தனதாகும்!

இதன்பொருட்டே எங்கோ நடந்தஒன்றுக்காக பதறும்

பிள்ளைதுன்பம் கண்டுவருந்தும் தாய்போல் உள்ளம்!

மனமோர் அத்தகைய விரிந்துசெயலாற்றும் தன்மையுளது!

ஒருபோதும் எல்லைகட்டாதீர் நானென்று குறுகிடாதீர்!

விளக்கம்:

மனித மனம் என்பது ஓர் அற்புதம் என்று, கடந்த பல கவிதைகள் மூலமாக உணர்ந்து வருகிறோம். பொதுவாகவே மனிதர்கள், இன்பம், துன்பம் என்பதெல்லாம் ஓவ்வொரு மனிதனுக்கும் தனித்தனி என்று நினைக்கிறார்கள். பொய்யாக நடிக்கும் நடிகர், நடிகையின் திரைக்காட்சி அழுகைக்கும், துன்பத்திற்கும் நீங்கள் வருந்துவதில்லையா? உண்டுதானே. ஆனால் காலப்போக்கில் இது “நடிப்பு” என்று பழகிவிடுவீர்கள். நீங்கள் கடந்து செல்லும் பாதையில், உண்மையாகவே அப்படி ஒரு மனிதன் துன்பப்பட்டாலும் உங்களால் சுலபமாக கடந்துவிட முடியுமா?

எனவே இன்பமும் துன்பமும் தனித்தனி என்றாலும் அது பிறரையும் பாதிக்கும். மனம் தன்னளவில் குறுகி நின்றே செயல்படுமானால், நீயும் நானும் வேறுதான் என்ற பிரிவான அனுபவம் உண்டாகிவிடும். ஆனால் நிறைவான, விரிவான மனதைக் கொண்டோர்க்கு உலக மக்களின் இன்பங்களும் துன்பங்களும் கூட தனக்கு நிகழ்ந்ததாக நினைப்பார்கள். இதனால்தான் அவர்கள் மகான்கள், ஞானிகள் என்றாகிறார்கள். இப்படியானவர்கள் எங்கோ நடந்த ஒரு துன்பத்திற்கு, தன் பிள்ளைக்கு ஏதோ நடந்துவிட்டது என்று தாய் பதறுவது போல உள்ளம் துடிப்பார்கள்.

உண்மையாகவே மனம், அப்படி விரிந்து செயலாற்றும் தன்மை கொண்டதாகும். அதனால், நான், நான் மட்டுமே என்று எல்லைகட்டி “ஆணவ” நிலையில் வாழ்ந்து குறுகிட வேண்டாம். அது இன்னும் பலவித துன்பங்களை உங்களுக்குள் விதைக்கும். இத்தகைய உண்மையை இந்தக்கவிதை நமக்கு விளக்கமாக தருகிறது.

-----

நன்கொடைகள் (Donate) வழங்க:

GPay: 9442783450@okhdfcbank
WhatsApp: 9442783450.wa.qvi@wahdfcbank
Bhim UPI: 9442783450@upi
PhonePe: 9442783450@ybl

Present by: