When and how does the thought work?! annex

 எண்ணம் எப்போது எப்படி செயலாகும்?!

கவிதை: இங்கே படிக்கவும்

விளக்கம்:

நான் நினைத்த எண்ணம் நிறைவேறுமா? என்றுதான் பெரும்பாலும் வேண்டி கேட்பார்கள். எங்கே? ஞானிகளிடம், மகான்களிடம், குருமார்களிடம்,  வழிபாட்டு தளங்களிலும், அங்கே இருக்கும் தெய்வத்திடமும். ஆனால் வேதாத்திரி மகரிஷியின் வேதாத்திரியத்தின் வழி செல்லும் அன்பர்களுக்கு அந்த கேள்வி இல்லை. எண்ணம் நிறைவேறும் என்பது உறுதிதான். ஆனால் அது எப்போது என்பதில் பல குழப்பங்கள் எல்லோருக்குமே இருக்கலாம். அதைப்பற்றி பேசுவோமா?

உங்கள் வீட்டின் தோட்டத்தில், நிலத்தில், பண்ணையில் ஒரு தென்னங்கன்று வாங்கி விதைக்கிறீர்கள் என்றால், அதன் வளர்ச்சி ஆயுளும், மனிதனின் ஆயுளும் சமமாக இருக்கலாம். அதாவது விதைத்தவரே அம்மரத்தின் இளநீயை பறித்து, நீர் அருந்தலாம், தேங்காயாகவும் சுவைக்கலாம். ஒரு பனை மரம், தென்னை மரத்திலிருந்து முற்றிலும் மாறுபட்டது. பனையை நாம் விதைத்தால் அது விதைத்தவருடைய வாழ்நாளுக்குள் வளர்ச்சியைத் தராது. அதன் நுங்குகள், பதனீர் இவற்றை ருசி பார்த்திட வாய்ப்பில்லை. இன்று நாம் அருந்தும் நுங்கு, பதனீர், கருப்பட்டி, பனைவெல்லம் இவையெல்லாமே, யாரோ ஒருவர் விளைவித்த பனையில் இருந்து கிடைத்தவைதான் என்பதை அறிந்துகொள்க.

எனவே பனை விதைத்தால், யார் விதைக்கிறாரோ அவரின் பிள்ளையோ, பிள்ளையின் பிள்ளையோதான் ருசி பார்த்திட முடியும். இதை ஒரு பழமொழியாகவும் நமது கிராமங்களில் இன்றும் சொல்லுவார்கள். அதுபோலவேதான் நாம் நினைக்கின்ற, எண்ணுகின்ற, தானாக எழுகின்ற எண்ணமும் செயலாக மலர்கின்ற தன்மை கொண்டது ஆகும். நான் நினைத்தேனே, அவ்வளவு உறுதியாக எண்ணினேனே ஏன் நடக்கவில்லை? என்று கேட்க வழியில்லை. அதிலும் முக்கியமாக, அந்த எண்ணம் நல்லதா, கெட்டதா, தகுதி வாய்ந்ததா, நேர்மையானதா, சுயநலமிக்கதா, எல்லோருக்குமானதா, அதன் நான் செயல்படுத்த முடியுமா? கால அவகாசம் உள்ளதா? இப்படி பல ஆராய்ச்சிக்கும் உட்படுத்த வேண்டியது அவசியம்.

இதற்கப்பால்தான் அந்த எண்ணம், இன்றோ, நாளையோ, பிறகோ, பல ஆண்டு கழித்தொ, நம் காலத்திற்குப் பிறகோ விளைவாக, செயலாக மலரும் என்பதை புரிந்துகொள்ள வேண்டும். மேலும் எண்ணமே காலமாகவும் இயங்கும் ஒத்ததன்மை அதற்குண்டு. எனவே உடனே, இப்பொழுதே, இக்கணத்திலே என்று எதிர்பார்ப்பதற்கு வழியேதும் இல்லை என்பதாக இந்தக்கவிதை எண்ணம் செயலாகும் விதம் குறித்த உண்மைகளை விளக்கமாக தருகிறது.

வாழ்க வளமுடன்.

-

நன்கொடைகள் (Donate) வழங்க:

GPay: 9442783450@okhdfcbank
WhatsApp: 9442783450.wa.qvi@wahdfcbank
Bhim UPI: 9442783450@upi
PhonePe: 9442783450@ybl

Present by: