Non-meaning Denial

அர்த்தம் இல்லாத மறுப்பு 

கடவுள் மறுப்புக்கு ஓர்காரணம்,

உழைப்பு இன்றி ஏதும்வாரா

என்னும் கருத்தே போதுமானது

என்றே அவர்கள் சொல்வார்கள்!

உலகில் இந்தவாழ்வு உடலாலே,

கேட்டாயோ எனக்கு வேண்டுமென்று?

என்றால் இயற்கை கொடையென்பார்!

அவருக்கு விளக்கம் இப்படிசொல்வோம்!

இயற்கையே எம்கடவுள் என்போம்நாம்!

என்மூலம் எதுவென்றறிய உடல்வந்ததே!

ஏதும்வாரா உழைக்காமல் என்பதறிவோம்.

மீறாத அளவுமுறை செயல்களினால்

நெறியாக உலககடமை ஆற்றிடவே,

தேவை நிறைவேறிடும் வாழ்வுஇனியதே!

விளக்கம்:

இந்த உலகில் மனித பிறப்பாக, நாம் ஒன்றும் கேட்டுப்பெறவில்லை. ஆனால் ஒரு பிறப்பில் மறைந்திருக்கும் நோக்கம், “தனது மூலம் எது?” என்று அறிவதற்கே ஆகும். அதற்கு துணையாகவே இந்த உடல் இயற்கையாக வந்திருக்கிறது. ஆறாம் அறிவாகவும் உயர்ந்து நிற்கிறது. ஆனால் இதையெல்லாம் கடவுள் மறுப்பாளர்கள் ஒத்துக்கொள்ள மாட்டார்கள்.

அவர்கள் சொல்லும் காரணம், இயற்கையால் பிறந்தோம், எதும் உழைக்காமல் வராது எனவே கடவுள் தேவையில்லை என்பார்கள். உழைக்காமல் இந்த உலகில் எதைத்தான் பெறமுடியும்? என்ற உண்மை அறியாதவர்களா நாம்?! இவர்கள் இயற்கை என்பதைத்தான் நாம் இறை, கடவுள் என்று சொல்லுகிறோம்.

நாம் வாழ உழைத்தே ஆகவேண்டும், அது இயல்பு. அதோடு இயற்கையோடு மீறாதவகையில் செயலாற்றி, நெறி தவறாது உலக கடமையும் ஆற்றினால், நம் தேவைகள் நிறைவேறிடும், நம் வாழ்வும் இனிதாகிவிடும். இத்தகைய உண்மைகளை இக்கவிதை சொல்லுகிறது.

வாழ்க வளமுடன். 

-----

Thanks to Image by: pexels and @Josh Willink