Materialistic and Spiritual Truth

 பொருளும் மெய்ப்பொருளும்!

உலகியல் வாழ்வில் ஊன்றுதல்

வேராழம் மண்ணில் உறுதிபோல்

பொருள் ஆதாரம் முழுமையின்றி

வாழ்வின் ருசியது தெரிந்திடாது!

எனினும் பொருள் கவர்ச்சியில்

மூழ்கிடாது எதுமெய்ப் பொருளாம்?

என்பதறிய ஆவல்கொண்டு அறிவீர்!

தேவையளவு முறையாக! வாழ்வை

முழுமையாக அனுபவித்தே வாழ்வீர்!

விளக்கம்:

இந்த உலகம் பொருள்முதல்வாத (Materialistic) உலகம் என்று சொல்லுவார்கள். ஓவ்வொரு தனி மனிதனும் கூட நாட்டின் பொருளாதாரத்தில் பங்குவகிக்கிறான் என்பது உறுதி. அதுபோலவே நாட்டின் வளர்ச்சியும் அம்மனிதனுக்கு உதவும். அப்படியான நிலையில், சோம்பேறித் தனமாகவோ, உழைப்பின்றியோ, பிறரைச் சார்ந்து வாழும் வாழ்க்கையோ, அவனை மட்டுமல்ல, எல்லோரையும் பாதிக்கும். 

எனவே ஒரு மனிதன் எவ்வகையிலேனும், ஒரு செடி மண்ணில் வேரைக்கொண்டு ஊன்றி நிற்பதுபோல, பொருளாதார பலம் கொண்டு நிற்க வேண்டும். அந்த வகையில்தான், வாழ்வில், தன் தேவைகளின் மூலமாக இனிமையை அனுபவிக்க முடியும். ஆனாலும், அந்த இனிமையில் மயக்கம் கொண்டு வாழ்க்கை முடித்துக்கொள்ளாமல், எது உண்மையான பொருள், மெய் பொருள் என்பதை அறிந்துகொள்ள வேண்டும்.

இதற்கான வழி, தன் பொருளாதார உயர்வை, தேவை, அளவு, முறை என்ற வகையில் பெறவும் வேண்டும், அதை உபயோகப்படுத்தவும் வேண்டும். அந்த நிறைவில்தான் வாழ்வை, முன்னைவிடவும் முழுமையாக அனுபவித்து வாழமுடியும். பிறப்பின் மூலமும் உணர்ந்து இறை உணர்வு பெற முடியும் என்பதாக இந்தக்கவிதை உண்மை விளக்கம் அளிக்கிறது.

வாழ்க வளமுடன்.

-----

Present by: