The only way available is

 கிடைத்திருக்கும் ஒரே வழி

இறையென்பது எனக்கு எதற்கு?

இக்கேள்வி கேட்பாய் என்றால்

வாழ்வில் வானம் இயற்கை

தாவரம் உயிரினம் சகமனிதன்

ஆதார சுருதி உணரமாட்டாய்!

தனித்து விடுபட்டு தவிப்பாய்!

கோவில் உச்சிமலை காடுஎங்கும்

இறைத்தேடி அலைந்து திரிந்தாலும்

உனக்குள்ளே போகாமல் காணமாட்டாய்!

கிடைத்திருக்கும் ஒரேவழி கடவுள்!

விளக்கம்:

அந்தக்காலத்தில் மனிதன் ஒழுக்கம் பெற்று, அன்பும் கருணையோடும் வாழ வேண்டும் என்பதற்காகவே, இயற்கையும், இறையும் உணர்ந்த மகான்கள், ஞானிகள், சித்தர்கள் நம்மை வழிநடத்தினார்கள். விளக்கமில்லா மக்களுக்கு நல்லது செய் என்பதற்காக சொர்க்கம், நரகம் என்று பயமுறுத்தினார்கள். சில போலி துறவிகள் இதை சொல்லியே பிழைப்பும் நடத்தினார்கள். அறிவியல் முன்னேற்றம் அதன் வளர்ச்சி ஆகியன சொர்க்கம், நரகத்தை இடமற்று செய்துவிட்டது. ஆனால் அதன் நல்லது செய் என்ற உண்மை அறிவிக்க தவறிவிட்டது.

இதனால் காலப்போக்கில் இறை நம்பிக்கையற்ற மனிதர்கள் உருவாகி விட்டார்கள். இவர்களே பிறரையும் தன் கூட்டத்தில் சேர்க்க ஆரம்பித்துவிட்டார்கள். ஆனால் தாங்கள் மாபெரும் தத்துவ உண்மைகளை தவறவிடுகிறார்கள் என்பது அவர்களுக்கு புரியவே இல்லை.

இன்னொரு இறை நம்பிக்கை மனிதர்கள் கோவில் குளம், மலை உச்சி இப்படியாக தேடித்தேடி அலைகின்றனர். இவர்களும் மாபெரும் தத்துவ உண்மைகளை தவறவிடுகிறார்கள் என்பது அவர்களுக்கு புரியவே இல்லை.

இதற்கெல்லாம் ஒரே வழி கடவுள், ஆம் கட (கடந்து) உள் (உள்ளே போ) !

வாழ்க வளமுடன்

-----