The two sides of the River bank

 இக்கரையும் அக்கரையும்!

கயிற்றின் மீதுநடக்கும் மனிதருக்கே

தகுந்த சமநிலை எப்போதும்வேண்டும்.

தரையின் மீதுநடக்கும் மனிதருக்கு

சமநிலை என்பதுவே தேவையில்லையே!

எவருக்கும் பொதுஇந்த உலகவாழ்க்கை!

நீயோஅவரோ என்னவாம் வித்தியாசம்?!

நிகழ்வதென்ன சொல்வேன் கேட்பீரே,

அவர்வாழ்வு சுகமென்று நீநினைக்கிறாய்!

உன்வாழ்வு சுகமென்று அவர்நினைக்கிறார்!

எதுசுகமென்று நீஇப்போது முடிவுசெய்வாய்!

விளக்கம்:

இந்த உலகில் வந்துபிறப்பது எல்லோருக்கும் பொது. அதுபோலவே காலத்தால் இறந்துமடிவதும் எல்லோருக்கும் பொது. இப்படியான மிகப்பெரும் உண்மை நிலையை மறந்து, இடைப்பட்ட காலத்தில் வாழும் வாழ்க்கையில் வித்தியாசத்தை ஏற்படுத்திக் கொள்வது, இயற்கைக்கே முரணான ஒன்றுதானே?

பெற்றோரின் வாழ்க்கை முறை, பொருளாதார திறன் ஆகிய இவற்றால் வித்தியாசம் வருவது இயல்பு. அதை எவ்வகையிலாவது நல்ல முறையில் உழைத்து சரி செய்வதுதானே முறை? ஏழை பணக்காரர் ஆவதும், பணக்காரர் எல்லாம் இழந்து தெருவுக்கு வருவது இந்த உலகில் நடப்பதுதானே? ஆனால் யாருமே இதையெல்லாம் கணக்கில் எடுத்துக்கொள்வது இல்லை.

ஒரு ஏழை, பணக்காரனை பார்த்து, அவன் வாழ்க்கை நன்றாக இருக்கிறது, நான் கஷ்டப்படுகிறேன் என்றும், ஒரு பணக்காரன், அந்த ஏழையை பார்த்து, எவ்வளவு பிரச்சனை இல்லாமல் நிம்மதியாக இருக்கிறான். நானோ கஷ்டப்படுகிறேனே என்றும் நினைத்துக் கொள்கிறார்கள்.  இதில் எது உண்மைநிலை என்று இந்த கவிதை விளக்கி, அதை நீங்களே முடிவுசெய்யவும் சொல்கிறது.

வாழ்க வளமுடன்.

-----

Thanks to Image by: Wikimedia common