Renunciation in the world?!

 உலகில் துறவு?!

முற்றும் துறந்தவன் ஞானியா?

துறந்தவன் வாழ்வது எங்கனம்?

இரந்தே வாழ்தலெளிதோ இப்புவியில்?

ஆதரவளிக்க தயாரோ நீயும்நானும்?!

துறத்தல் எதுவென்று சொல்வேன்

துறவென்பது உறவில் கண்டதெளிவே!

முறையும் அளவும் கொண்டால்

அதுவே உண்மைத் தெளிவாம்!

விளக்கம்:

யோகம் கற்றால் எல்லாவற்றையும் இழக்க நேரிடும் என்றே நினைக்கிறார்கள். இந்த உலகில் பிறந்தவர் எவருக்கும், வாழும் வரை தேவைகள் நிறைவேற்ற பணம், பொருள் வேண்டும். துறவியும் ஞானியும் விலக்கல்ல. எல்லாம் துறந்தவன், இந்த உலகில் எப்படி வாழமுடியும்? பிச்சை எடுத்து வாழ முடியுமா?

அப்படியாக பிச்சை எடுத்தால், நீங்களோ நானோ அவருக்கு ஏதேனும் கொடுப்போமா? “கை கால் நல்லாத்தானே இருக்கு, உழைத்து சாப்பிடு” என்று அறிவுரைதானே கொடுப்போம்!

ஒரு ஞானி உழைக்கிறார். எதற்கு?! ஒவ்வொரு மனிதரும் அறிவில் உயர்வு பெற்று, இறை உணர்வு தந்து, இயற்கையோடு கலந்து வாழ வழி செய்கிறார். ஆனால் அதை நாம்தான் ஏற்றுக் கொள்வதில்லை.

துறவு என்பது என்ன? எல்லாவற்றையும் துறப்பதல்ல. எதையும் அளவு, முறையோடு வைத்துக்கொண்டால் அதுவே துறவு ஆகும். உன் தேவைக்குப் போதுமான பணம், பொருள், வீடு, வசதிகள், நண்பர், பந்தம், சொந்தம் கொண்டால் துறவு, முறை மீறினால் அது உறவு. என்பதாக இக்கவிதை நமக்கு விளக்கம் அளிக்கிறது.

-----