The limit and the limitless!

எல்லையும் எல்லை அற்றதும்!

பக்தியும் யோகமும் வேறுவேறில்லை

பக்தியின் தொடக்கம் வளர்நிலை,

யோகத்தில் கொண்டு சேர்த்திடும்.

பக்தியே போதும் என்றாலும்சரி

யோகமே முடிவு என்றாலும்சரி

தேர்ந்தெடுக்க உரிமை அவரவர்க்கே!

என்றாலும் பக்தி ஓர்வட்டத்திற்குள்ளே,

யோகம் வட்டத்தையும் உள்ளடக்கியவிரிவு!

விளக்கம்:

மனித பரிணாம வளர்ச்சியில், முதலில் தோன்றியது பயம், பிறகு அந்த பயத்தை போக்க பக்தி என்பதாகவே மலர்ந்திருக்கிறது. பிறகு அப்பக்தியில் திளைத்தோர், உண்மை அறிந்தபோது இரண்டுமற்ற நிலை அறிந்தார்கள், அது யோகமார்க்கம் என்றாகியது. ஆனாலும் பக்தி மார்க்கத்தில், மக்களின் பயம் மிச்சம் இருந்தது. அந்த பயத்தை பயன்படுத்தியே, தங்களையும் தங்கள் கருத்தையும் நிலைநிறுத்த ஆசை கொண்டு, பக்தியோகமே சிறந்தது, யோகம் வேண்டாம். தெய்வத்தை வணங்கு, பூசை செய், வேண்டுதல் நிறைவேற்று என்றபடி மக்களை மூளைச்சலவை செய்துவிட்டனர். 

என்றாலும் கூட, உண்மை என்றும் நிலைக்கும் அல்லவா? எனவே யோகம் தழைத்தது. யோகம் யாரையும் கட்டாயப்படுத்தவில்லை. விரும்பினால் ஏற்றுக்கொள் என்றே சொன்னது. முடிவெடுப்பது அவர்வர்களே. அந்த வகையில்தான் இன்று, பக்தி மார்க்கமும், யோக மார்க்கமும் உலகில் இருந்துவருகிறது. சிலர், இந்த இரண்டையும் இணைத்தும் வேடிக்கை காட்டுக்கிறார்கள்.

ஆனால், ஒன்றை புரிந்துகொள்ள வேண்டும். அது, பக்தி மார்க்கம் என்பது ஒர் எல்லைகளை கொண்டது. யோக மார்க்கமோ, எந்த எல்லைக்குள்ளும் சிக்காத விரிவு கொண்டது. இவ்வாறாக இக்கவிதை விளக்கமளிக்கிறது.

வாழ்க வளமுடன்.

-----

Thanks to Image by: Shutterstock