Unstoppable Running!

நிற்காத ஓட்டம்!

முழுதாக ஓர்நாள் போதவில்லை

கடமையாற்றி நம்மைனிறுத்த இவ்வுலகில்!

ஓடுகிறோம் ஒய்வெடுக்க நேரமின்றி!

கடமையோ என்னஎன்று பிரித்தால்

வேலைதொழில் பணம்வீடு வியாபாரம்,

மனைவிமக்கள் உற்றார் உறவினராம்.

மறந்தாயே உன்பிறவிக் கடமையை!

வந்தவழி செல்லும்வழி விலகிவிட்டாய்!

கொண்டு வந்ததும் போவதுமேதுமில்லையே!

உண்மை இதையும் சிந்திக்கவில்லையே!

ஓர்நாள் ஓர்நிமிடம் ஓர்நொடியேனும்

நிறுத்திஉன் உண்மைகடமை நினைவாய்!

விளக்கம்:

கடமை, கடமையென்றே நன்றாக தூங்க முடியாமல், நன்றாக சாப்பிட முடியாமல், நிற்க நேரமில்லாது ஓடிக்கொண்டே இருக்கிறோம். ஒரு நாள் போதுமானதாக இல்லையே என்று கவலைப்படுகிறோம். அப்படி என்னதான் கடமையாற்றுகிறோம்? என்று பார்த்தால்...

வேலை, தொழில், வியாபாரம், பணம், வீடு, மனைவி, குழந்தைகள், உற்றார், உறவினர் என்று விரிந்திருக்கிறது. சிலருக்கு இன்னும் சில பல இருக்கலாம். ஆனால் இதுதான் உண்மைக் கடமையா? என்று கேட்டால், இவை எல்லாம் வாழ்நாளுக்கான துணைக் கடமைகள்தான்.

பிறவி எடுத்ததின் கடமை மறந்தோம். ஏன் பிறந்தோம், ஏன் இறக்கிறோம் என்பதும் மறந்தோம். ஆனால் எதோ நிறைவேற்றுவதாக ஓடுகிறோம்.

வரும்போது கையில் ஒன்றுமே இல்லை. போகும்பொழுதும் வெறும்கைதான். இதை ஒரு நொடி, என்றாவது சிந்தித்தோமா? இனியும் தாமத்திக்காமல், எது நம் உண்மைக்கடமை என்பதை நினைந்து, வாழ்வை சிறப்பித்துக் கொள்க என்று இக்கவி விளக்கமளிக்கிறது. 

வாழ்க வளமுடன்.

-----

Thanks to Image by: Internet Source