Volcano and Meditation

எரிமலையும் தவமும்!

எரிமலையே ஆனாலும் காத்திருக்கும்.

புகையாய் தூசியாய் புழுதியாகவே,

கக்கிடுமது நீண்டகாலம் தொடரும்.

அத்தொடர் வரிசையில் ஒலியும்மிகும்,

ஒலிகடந்து சீற்றமாய் கங்குகள்தரும்.

பிறகேஅது நெருப்புக் குழம்பைக்கக்கி,

சீறீப்பாய்ந்து வெளிக் கிளப்பிப்படரும்.

அகத்தவம் அதுபோலவே அக்கறையாய்

ஆராய்ச்சியாய் தொடர்ந்தே செய்துவர

நாளொன்றாய் வளர்ச்சி தந்தூய்க்கும்!

விளக்கம்:

நேற்று அகத்தவம் கற்றுக்கொண்டு, இன்று முழுமை அடையவேண்டும் என்றுதான் எல்லோரும் நினைக்கிறார்கள். அந்தக்காலத்தில்... என்று ஆரம்பித்தால், “அதையெல்லாம் பேசாதே” என்பார்கள். உலகம் எவ்வளவு முன்னேறிவிட்டது தெரியுமா? ஒரு ஆர்டர் கைபேசியில் தட்டிவிட்டால், உணவே வந்துவிடுகிறது என்று பதில் தருகிறார்கள்.  அகத்தவம் அத்தனை எளிதா?

இல்லை. சித்தர்கள் வாழும் காலத்தில், முறைப்படுத்தபட்ட அகத்தவம், ஓவ்வொரு காலத்திலும், ஆராய்ச்சியால் வளர்ந்து கொண்டு வந்து, எளிய முறை குண்டலின்யோகமாக மலர்ந்து நிற்கிறது. இதை கற்றுத் தேர்ந்து, அதற்கென்று நேரம் ஒதுக்கி, விடாமுயற்சியோடும், ஆராய்ச்சியோடும் தொடர்ந்து செய்துவந்தால் மட்டுமே, இறை உணர்தல் கிடைக்கும். பயிற்சியும், காலமும் சமமானவை. அவரவர் கர்மா அல்லது வினைபயன் பொறுத்து, ஒருவருக்கு எளிதாகலாம், பிறருக்கு கடினமாகலாம்.

ஒரு எரிமலை, உடனடியாக நெருப்பை கக்கி, நெருப்பு ஆற்றை தந்து அடங்கிவிடுவதில்லை. நீண்ட ஆண்டுகளுக்கு புகையும், தூசியை, புழுதியை பரப்பும், ஒலிசீற்றம் கொள்ளும். அதற்கும் பிறகே நெருப்பை தன்னிலிருந்து கக்கி பரப்பும். அகத்தவமும் அதுபோலவே நீண்ட காத்திருப்பின் வழியாகவே பலன் தரும் என்று இக்கவிதை விளக்கம் அளிக்கிறது. 

வாழ்க வளமுடன்.

-----

Present by:

Thanks to Image by: Nasa / istockphoto