Bhakti Yoga Two Divisions

பக்தி யோகம் இருபிரிவு

முந்தையோர்கள் தந்த தத்துவஞானம்

எண்ணுமெழுத்தும் அறியா மனிதர்க்கு

குறிப்பாலுணர்த்த சமயம் அமைந்தது

உருவம்கொண்டு அறிதல் கடவுளாச்சு

அதுவேபிறகு மக்களை திருத்தஉதவிற்று!

கூடித்திருந்த வழியாக கோயில்குளமாச்சு

பின்னாளில் அதுவே வியாபாரஸ்தலமாச்சு

உண்மையுணர்ந்த சித்தர் தனிவழியானர்

அகத்தவமதனை உலகில் பரப்பலானார்

தேர்வோர்பக்தியோக இரண்டு பிரிவுமானார்!

விளக்கம்:

மனிதனுக்கு எப்பொழுது, இந்த இயற்கையின் மீது பயம் இல்லாமல்போனதோ, அப்பொழுதே “கடவுள்” என்பதையும் பயமின்றி கடந்துவிட்டான். இப்பொழுது அவனுக்கு இயற்கையும், கடவுளும் தேவையில்லை என்ற முடிவுக்கு வந்துவிட்டான். ஆனால் உண்மை என்ன?

மனிதர்கள் சிந்திக்க ஆரம்பித்த உடனே, நான் யார், ஏன் பிறந்தேன், ஏன் வாழ்கிறேன், இறந்தும் போகிறேன். இதற்கு என்ன அர்த்தம்? இறந்தால் எங்கே போகிறேன், ஏன் மீண்டும் இறந்தவரே பிறப்பதில்லை, உடல் அழிந்துவிட்டது, சாம்பலாகிவிட்டது, உயிர் எங்கே? என்றெல்லாம் கேள்வி கேட்டு பதில் தேட ஆரம்பித்து விட்டார்கள்.

அப்படியாக அவர்கள் அறிந்த உண்மைகளை, தத்துவ ஞானமாக கொண்டார்கள். அந்த ஞானியர்கள், எளிய மக்களுக்கு விளக்க, குறிப்பாக உணர்த்த சமயம் என்பதை அமைத்தார்கள். அதற்கு சொல்லப்பட்ட உருவங்கள் பிறகு கடவுள் ஆகிற்று. அந்த உருவத்தை கண்டு, கலந்து பேசி திருத்தம் கொள்ள கோவில், குளம் கட்டினார்கள். 

பிற்காலத்து அரசு, அரசியலில் அது வியாபரத்திற்கு தகுந்த இடமாக மாறிவிட்டது. இதற்கிடையே சமயம் சாரத ஞானியர்கள், சித்தர்களாக, தனிவழியில் அகத்தவம் கற்று இறை உணர வழி தந்தார்கள். சமயம் தந்த ஞானியர் பாதை பக்தி மார்க்கம் என்றும், சித்தர்கள் தந்த பாதை யோக மார்க்கம் என்று இரண்டு பிரிவுகளாக இந்த உலகில் மாறிவிட்டது. இந்த உண்மையை இக்கவி விளக்குகிறது.

வாழ்க வளமுடன்.

-----

Present by: