Don't regret it anymore!

 இனி வருத்தம் வேண்டாம்!

தினம்நிகழும் நிகழ்ச்சி கவனித்தால்

எல்லாவற்றிக்கும் ஒன்றோடு ஒன்றாக

தொடர்பிருக்கும் அதிசயம் காணலாம்.

நீவிரும்பியதை உனக்குதருவதும் நிகழும்

நீசெய்ததற்கு பிரதிபலனும் நிகழும்

உன்மூலமாக சிலநல்லதும் நிகழும்

உன்னைத்திருத்த சிலபாடமும் நிகழும்

எதுநிகழ்ந்தாலும் விளைவு உன்னிடமில்லை

எண்ணம்செயலுமே உன்னில் பிறப்பிடம்

பொருத்தமாக நிகழவே திருத்தம்கொள்!

விளக்கம்:

எண்ணம், சொல், செயல் ஆகிய இவற்றில் கவனம் கொண்டு விழிப்புணர்வோடு, உலகில் வாழவேண்டும் என்ற உண்மையை இக்கவி விளக்கித் தருகிறது. ஏனென்றால், நம் வாழ்வில் நமக்கு நடக்கும் நிகழ்வில் நம்முடைய பங்கு நிறைய உள்ளது. அந்த விளைவுகள் நம்மை கஷ்டப்படுத்தாத வகையிலும், மேலும் சிக்கலாக்காத வகையிலும் இருக்க வேண்டும் அல்லவா?

ஒரு நாள், ஒரு வாரம், ஒரு ஆண்டு நமக்கு நிகழ்ந்த பிரச்சனைகளை மட்டும் அலசிப்பார்த்தால், எல்லாவற்றிலும் நாம் செய்த தவறு ஓரளவு நமக்கு புரியும். ஆனால் இனிமேல் அதை திருத்த வழி என்ன? அனுபவத்து தீர்க்க வேண்டியதுதான். இனிமேல் இத்தகைய பிரச்சனை எழாத விழிப்புணர்வு பெற்றால் போதுமானது.

உண்மையில், நடந்த அல்லது நடக்கும் நிகழ்வுகள், 1 ) நாம் விரும்பியதை தந்திருக்கும் 2) நாம் செய்ததற்கு பலனாக வரும்,  3) நாம் ஏதேனும் பிறருக்கு நல்லது செய்ய வாய்ப்பாக வரும் 4) நாம் செய்த தவறுக்கு பாடமாக நம்மை வருத்துவதற்காக வரும். இப்படியாக நான்கு நிலைகளில் நமக்கான நிகழ்வுகள் உள்ளன.

இதிலிருந்து நாம் நல்லதை மட்டுமே பெற, நல்ல விளைவு நோக்கி செயல்பட வேண்டும். அதற்காகவே நம் எண்ணம், சொல், செயல் இவற்றில் திருத்தம் பழகிக்கொள்ள வேண்டும்.

வாழ்க வளமுடன்.

-----

Present by: