Foundation of the Mind

 மனதின் அடித்தளம்

தெய்வம் எங்கே? என்றேகேட்பார்

தினமும் உன்செயல் பதிந்துனக்கே

திருப்பித் தரும்மன சாட்சியாகக்

காண்பதுவே தெய்வம் என்பதாகும்!

உன்செயல் நன்றோ தீதோஎதுவோ

அத்தனை தொகுப்பும் மூலதனமாம்

இனிவரும் உனக்கான பாதையாகும்.

தவிர்த்திட வழிஏது கருவழியேபுகும்!

மனஅடித்த தளமே இறையிடமாம்

அதுஇல்லை எனில் எதுதெய்வமாம்?

விளக்கம்:

தெய்வம், இறை, கடவுள் எங்கே என்று கேட்போருக்கும் பதில் இருக்கிறது. “இறை” இறைந்து இருக்கிறது. தனியாக தேட வேண்டியதும் இல்லை, நமக்குள்ளாகவும் இருக்கிறது. உதாரணமாக, சிறிய வயதில் நீ என்ன செய்தாய்? என்று கேட்டால் 3 வயது முதல் ஓவ்வொன்றாக சொல்லமுடியும்? இதை யார் பதிந்து வைத்தது? ஏதேனும் ஒரு கருவி நம்மிடம் இருக்கிறதா? கருவி வைத்துக்கொண்டா இப்போது ஒரு செய்கிறோம்? அப்படி பதியாத ஒரு செயலை உங்களால் செய்ய முடிகிறதா அல்லது முடியுமா? 

அப்படியான பதிவை மனசாட்சி என்று சொல்லுகிறோம். குரு மகான் வேதாத்திரி மகரிசி அவர்கள், “மனதின் அடித்தளமே நிலைபொருள், தெய்வம்” என்று குறிப்பிடுகின்றார். ஆனால் அதை மனிதர்கள் ஏற்றுக்கொள்வதில்லை. இதெல்லாம் மனிதனின் இயல்பு என்று கடந்துவிடுவர். சரி அவர்கள் அந்த புரிதலுக்கு வரும்போது வரட்டும்.

நல்லது செய்தாலும், அல்லது செய்தாலும் அந்த பதிவுகள் நமக்கு மூலதனமாகின்றன. அதற்கு தகுந்தபடி நம் பாதை தீர்மானிக்கப்படும் என்பதே உண்மை. நீங்கள் பெற்றதை திருப்பித்தர வேண்டிய கடமை உண்டு அல்லவா? 

நான் ஏற்கமாட்டேன், தப்பித்துவிடுவேன் என்று சொன்னாலும், அது நம் வாரீசுகளிடம் கருவழியாக வந்து சேர்ந்துவிடும் என்பதை மறவாதீர். மனசாட்சியை எளிதாக புரிந்து, தெய்வத்தை உணரமுடிந்தால் நல்லது, அப்படியில்லையானால் வேறே எது தெய்வம்? என்று கேள்வியாகவே இக்கவிதை நம்மிடம் கேட்கிறது.

வாழ்க வளமுடன்.

-----

Present by: