Let's see the type of living!

 வாழ்தல் வகை காண்போம்!

யாரையேனும் சார்ந்து வாழ்தலொன்று

போராடித் தனித்தே வாழ்தலொன்று

வெகுளித் தனமான வாழ்தலொன்று

பிறரையே ஏமாற்றி வாழ்தலொன்று

பிறர்வளம் பறித்தே வாழ்தலொன்று

மற்றத்தனையும் இதன்கீழே வந்துனிற்கும்!

உலகில்எப்படி வாழ்தல் என்பதிங்கு

அறிவுரை தானெனினும் சட்டமில்லை,

ஆனால்தப்பாது தண்டிக்கும் இயற்கை,

செயல்விளைவு நீதீயாகச் சட்டமுண்டு.

நலம்விதைத்தே வாழ்ந்தால் சுகமுண்டு!

விளக்கம்:

உலக வாழ்க்கையில், நாம் வாழும் வாழ்வு, தானாக அமைந்ததா அல்லது நாம் அமைத்துக் கொண்டோமா என்ற கேள்விக்கு மிகச்சரியான பதில் கிடைக்காது. ஏதேனும் வகையில் பிறரின் உதவியும், ஒத்துழைப்பும் அதில் இருக்கக் காணலாம். பொதுவான வாழ்க்கை முறை சிலவற்றை இப்படி அமைக்கலாம்.

அவை 1) யாரையேனும் சார்ந்து வாழ்தல் 2) போராடி தனித்தே வாழ்தல் 3) வெகுளித்தனமாக வாழ்தல் 4) பிறரை ஏமாற்றி வாழ்தல் 5) பிறரின் வளம் பறித்தே வாழ்தல். இதைத்தவிர ஏதேனும் ஓர் வாழ்க்கை முறையும், இதன் கீழாகவே அமைந்துவிடும்.

ஒரு மனிதர் எப்படி வாழ வேண்டும்? அல்லது இப்படித்தான் வாழ வேண்டும் என்று எந்த நாட்டிலும் சட்டம் இல்லை. என்றாலும் பிறருக்கு தீங்கு அல்லது அமைதி குலைப்பு என்றால் அங்கே சட்டம் பாயும். ஆனாலும் இயற்கை, ஓவ்வொரு மனிதருக்கும் உள்ளாக சட்டம் அமைத்திருக்கிறது. நமக்கு தெரியமலேயே அச்சட்டத்தின் படி தண்டனையும் கிடைக்கும். உண்மையாக அது நமக்கு தெரியாது அல்லது அறியமுடியாது.

ஆனால் ஒரு மனிதர், தனக்கு நேரும் துன்பங்களின் வழியாக, அந்த இயற்கை சட்டம் செயல்படுவதை உணரமுடியும். தண்டனையில் இருந்து தப்பிக்கவும் முடியாது. ஆனால் இனிமேல் அப்படி “இயற்கை சட்டத்திற்குள்” சிக்காதவாறு வாழ முடியும். எப்படி? பிறர் நலம் விரும்பி செயல்பட்டால் மட்டுமே! என்று வாழ்தல் வகையும், இயற்கை சட்டமும் பற்றி இக்கவிதை விளக்குகிறது.

வாழ்க வளமுடன். 

-----

Present by: