Moving

 நகர்தல்!

தேங்குதலும் தங்குதலும் தடையும்

எப்போதும் பிரச்சனை உருவாக்கும்

ஓடிக்கொண்டு இருத்தலே இயற்கையாம்

உண்மையெது என்றால் மூலம்நகர்தல்!

உன்பிறப்பும் என்பிறப்பும் அவ்வழியே

மற்றெல்லா உயிரும்கூட அப்படியே

பிரபஞ்சப் பொருளுமே விலக்கல்ல!

இதில்மனிதன் படைத்த பணம்மட்டும்

தங்கிடுதல் எங்கனம்? கெடும்நிம்மதி!

வழியுண்டு தேவையளவு முறையுணர!

விளக்கம்:

இந்த பிரபஞ்சத்தில் எல்லா கோள்களும், உலகமும் இயங்கிக் கொண்டேதான் இருக்கிறது. ஒரே இடத்தில் எதுவுமே நிலைப்பது இல்லை, தேங்குவதும், தங்குவதும் இல்லை. நாமும் அப்படியே, நமக்குள்ளாக உயிர், மனம், உடல் செல்கள் இயங்கிக் கொண்டேதான் இருக்கிறது. உயிர் இயங்காத போதுதான் நாம் சவம் ஆகிவிடுகிறோம் அல்லவா?

நாம் மட்டுமல்ல, தாவரம் முதற்கொண்டு எல்லா உயிரினங்களுமே அப்படித்தான். உண்மையில் எல்லாமே மூலம் நோக்கி நகர்கின்றன என்பதே உண்மை. அந்த மூலம் உணர்ந்து கொள்ளவே நம் பிறப்பு நிகழ்ந்தது.

ஆற்று நீருக்கு குறுக்கே, அணை கட்டலாம், ஆனால் நீர் தேக்கம் நிறைந்தால், அணை உடைந்துவிடுமே? ஊரெங்கும் வெள்ளம் அல்லவா வரும்? ஆறு, மூலமான கடல் நோக்கி நகர்வதை தடைசெய்ய முடியுமா?

இந்நிலையில், மனிதன் படைத்த பணம், நல்வழியோ, தீய வழியோ, அளவுக்கும் அதிகமாக சேர்த்து வைத்து, அதற்கு ஓர் தடை உண்டாக்கினால் முடியுமா? சொத்துக்களாக, நகையாக, வீடாக, நிலமாக மாற்றி வைத்தாலும் நிலைக்குமா? உங்கள் நிம்மதி கெடுக்குமே?

நிம்மதி கெடாமலிருக்க வழி என்ன தெரியுமா? பணத்தின் தேவை, அளவு, முறை அறிந்து சேமித்தும், செலவு செய்தும், மகிழ்ந்து வாழ்க என்று இந்தக்கவிதை விளக்கம் அளிக்கிறது. 

வாழ்க வளமுடன்.

-----

Present by:

Thanks to Image by: internet source