Not Compulsory

 கட்டாயமில்லை!

வாழ்கின்ற மனிதருக்கு கட்டாயம்

இறையுணர வேண்டும் என்றில்லை!

சட்டமும் கண்டிப்பும் ஏதுமில்லை!

ஆனாலும் அதுதானே இப்பிறப்பின் 

நோக்கமாக மலர்ந்தது விரிந்தது!

சிந்தனையும் அறிவுமிக்க பிறவியாக

பிறந்துவிட்டு சிறுமதியுடன் வாழ்வதோ?!

அறிந்தாலும் இகழ்ந்தாலும் வாழ்வுஒன்றே!

அறிந்தால் பிறவிப்பயன் பெற்றுவிட்டீர்!

இகழ்ந்தால் மறுபிறவியாக பிறந்துவிட்டீர்!

விளக்கம்:

இறையுணர்வு பெற வாருங்கள் அன்பர்களே என்று அழைத்தால், வெகு சிலருக்கே அந்த ஆர்வம் எழும். உதாரணமாக, ஒரு ஆயிரம் நபர்களுக்கு விளக்கம் அளித்தால், யாரேனும் ஒருவர் மட்டுமே “எனக்கு ஆர்வமிருக்கிறது” என்று தயாராவார். 

வாழ்ந்து அனுபவிக்கத்தானே பிறந்தேன் என்பதே பெரும்பாலான மனிதர்களின் போக்காக இருக்கிறது. அதில் தவறில்லைதான். ஆனால் அதில் ஏன் இவ்வளவு பிரச்சனைகளும், சிக்கல்களும், விளைவுகளும் உண்டாகின்றன. உண்மையிலேயே இன்பமாக வாழ்கிறீர்களா? என்று கேட்டால் பதில் இல்லை.

ஆனாலும் நீங்கள் இறை உணர்வு பெற்று, உங்கள் மூலம் எது என்று அறிக என்பது, கட்டாயமிலை, சட்டமும் கண்டிப்பும் இதில் இல்லை. பரந்து விரிந்த அறிவை, இவ்வுலகிலும், உலகில் உள்ள இன்பத்திலும் சிக்க வைத்துக் கொள்வது சரியா?

இறையுணர்வு பெற்றாலும், அது வேண்டாமென்றாலும் கிடைத்த வாழ்வு ஒன்றேதான். இறையுணர்வு பெற்றால் முழுமையுணர்ந்து பிறவிக்கடன் தீர்த்துவிட்டீர்கள். இல்லையானால் அந்த நோக்கம் நிறைவேறுவதற்காக அல்லது நிறைவேற்றுவதற்காக மீண்டும் பிறந்துகொண்டே இருப்பீர்கள், உங்கள் வாரிசுகளாக. இவ்வாறாக பிறவியின் உண்மை நிலையை, இக்கவிதை விளக்குகிறது.

வாழ்க வளமுடன்.

-----

Present by: