Change to a good path!

 நல்ல பாதைக்கு மாறுவீர்!

வாழ்ந்து அறிந்து உண்மை கண்ட

ஞானியர் சொன்ன வழியே நடக்க

உலகின் வாழ்வில் இன்பமே தரும்!

தான்தன் நலமே கொண்ட மக்கள்

தனையே ஒற்றிய தலைவரை சார

மனிதரும் நாடும் பிளவுறும் காணீர்!

மூலமது ஒன்றே எல்லா உயிர்க்கும்,

சிந்தித்தே பாதை மாறிட முயற்சிப்பீர்.

விளக்கம்:

இந்த உலகில் வாழும் மக்கள் எப்படியான நிலையில் வாழ்கிறார்கள்? என்ற கேள்வியில் பதில் தேட முயற்சித்தால் விடை என்னவாக இருக்கும்?! எல்லா உயிர்களுக்கும், பொருட்களுக்கும் மூலம் ஒன்றே என்பது உண்மையாக இருந்தாலும், இந்த உலகம், நாடுகளாக, இனங்களாக, மொழியாக, மதமாக பிளவுபட்டே இருக்கிறது. ஆனாலும் நாட்டின் வளர்ச்சி, மக்கள் நலம் என்ற கருத்தில் சில நாடுகள் ஒன்றுக்கொன்று, வேற்றுமையில் ஒற்றுமை என்று கை கோர்த்துக்கொள்கிறது. பலனும் அடைகின்றன. ஆனால் மக்களின் துன்பம் குறைந்திருக்கிறதா? என்றால் சரியான பதில் இல்லை.

தன்னுடைய வாழ்வில் ஏற்பட்ட சிந்தனைகள் வழியாக, நான் யார்? இறை என்பது யாது? என்று ஆராய்ந்து உண்மை அறிந்த ஞானியர்கள், “இன்பமே இவ்வுலகில் எங்கும் நிறைந்திருக்கிறது” என்பதை உணர்ந்தார்கள். அந்த இன்ப வாழ்வுக்கான வழிகளை நல்லறம் மூலம் கொண்டுவரலாம் என்பதை மக்களுக்கு வழிகாட்டினார்கள். அதற்காக சொன்ன நல்லது செய்தால் சொர்க்கம், அல்லது செய்தால் நரகம் என்ற “பயமுறுத்தல்” காலாவதி ஆனபோதும், நல்லதும் கெட்டதும் என்றும் உண்மையே. 

கெட்டதை விலக்கி, நல்லதை செய்ய இன்னமும் மக்கள் தயாராகவில்லை என்றே சொல்லலாம். பொதுவாகவே மக்கள் தான், தனது என்ற மனநிலையிலேதான் வாழ்ந்து வருகிறார்கள். தன் தலைவர்களையும் அந்த நிலையிலேதான் பொருத்தம் பார்த்து தேர்ந்தெடுக்கிறார்கள். இதனால், சக மனிதர்களும் நாடுகளும் துண்டாகின்றன. ஒற்றுமையை அழித்துவிடுகிறது.

இந்த உண்மையை அறிந்து, எல்லா மனிதர்களும் சமமே, எல்லோருக்கு மூலம் ஒன்றே என்ற சிந்தனையைக் கொண்டு, உண்மை அறிந்து, குறைகளை களைந்து வாழ்ந்தால் இன்பம் நிலைக்கும் என்ற கருத்தை இந்தக்கவி விளக்குகிறது.

வாழ்க வளமுடன்.

-----

Present by: