Guru as a Guide!

 வழிகாட்டி!

வழிகாட்டி தேவை ஓரிடம்போய்சேர!

அவரையே நம்பி கைபிடித்தும்கூட

முன்பே போய்வந்த அனுபவமின்றி

இருந்தால் வழிகாட்டி பயனென்ன?

வழிகாட்டி நிறையவே இறைகாட்ட

உண்மை அனுபவம் எத்தனைபேர்க்கு?

பக்திமுக்தி ஞானமென்று நுனிநாக்கில்

பேசியேதிசை திருப்புவார் மீறிக்கேட்டால்

மௌனம் என்றேவாய் மூடிவிடுவார்!

இறைக்கு முன்னேதேவை வழிகாட்டியே!

விளக்கம்:

நமக்கெல்லாம் முன்னரே போய்வந்த நகரத்திற்கு, இடத்திற்கு போவதும் வருவதும் மிகச்சுலபம். ஆனால் முற்றிலும் புதிய நாட்டுக்கு, நகரத்திற்கு, இடத்திற்கு போவது என்பது மிகக்கடினம். அதை புதிய அனுபவமாக பெற வேண்டியது இருக்கும். ஆனால் இதற்கு ஒர் எளிய வழி, ஒரு வழிகாட்டியை தேர்ந்தெடுத்துக் கொள்வது ஆகும். சில சுற்றுலாத்தலங்களை கண்டு ரசிக்க இப்படியான வழிகாட்டிகள் உண்டு. அது ஒரு தொழிலாகவும் இருக்கிறது என்பதும் உண்மை.

இறையை அறிந்து உணர்வதற்கும் ஒர் வழிகாட்டி தேவை. அவரை நாம் குரு என்று அழைக்கிறோம். எப்படி வழிகாட்டி குறிப்பிட்ட இடத்திற்கு போய் வந்த அனுபவம் பெற்றிருக்கிறாரோ, அதுபோலவே குருவும் இறை அறிந்து உணர்ந்த தெளிவில் அனுபவம் பெற்றிருப்பார்.

அனுபவம் இல்லாத வழிகாட்டியை நம்பி நாம் குறிப்பிட்ட இலக்கை சென்றடைய முடியுமா? முடியாது அல்லவா? அதுபோலவே குருவும். ஆனால் அப்படியான குரு மிக சொற்பமே. எப்படி போலியான வழிகாட்டிகள் இருக்கிறார்களோ, அப்படி போலியான குருவும் இருக்கிறார்கள். 

இறையை தேடுவதற்கு முன்பு, யார் உண்மையான, அனுபவம் வாய்ந்த குரு என்பதை தேடுதல் முதன்மையானது ஆகும்.  சில போலி வழிகாட்டியான குரு, பக்தி, முக்தி, ஞானம் என்று நாக்கு நுனியில் விபரங்களை பேசுவார் ஆனால், உண்மை இறை அவரே அறியாது இருப்பார் அல்லது மேலும் திசை திருப்புவார். மேலும் மேலும் கேட்டால் “இன்று மௌனம்” என்று வாய் மூடிவிடுவார். என்பதாக இந்தக்கவிதை குருவின் சிறப்பு பற்றி இக்கவிதை விளக்குகிறது.

வாழ்க வளமுடன்

-----

Present by: