The Subject is here!

 பொருள் இங்கேதான்!

கையிலே இருக்கும் பொருளை தினமும்

காணாமே என்றே தேடித்திரியும் மனிதர்

நம்மோடு பலரும் இருக்கும் நிலைதான்!

கடவுளை உள்ளே தேடாது வெளியிலே

காணத் துடிக்கும் பக்தியால் மனிதர்கள்!

எப்படி முடியும் கடந்துள்ளே போகாமல்?!

பக்தியோ வந்தவழி முழுமை அறியவே,

வழியடைத்து திசை திருப்பி விட்டதுசதி!

விளக்கம்:

வாழ்க்கையில் சிலருக்கு, பல்வேறு கவனம் தொடர்பாக சில சின்னச்சின்ன விசயங்களை மறந்து விடுவார்கள். பெண்கள் தலைவாரிடும் பொழுது சீப்பை தேடுவார்கள், அது ஏற்கனவே தலையில்தான் இருக்கும். ஆண்கள் சட்டையில் பேனா வைத்துக்கொண்டே, பேனாவை தேடுவார்கள். அதுபோல அணிந்திருக்கும் கண் கண்ணாடியை காணாமே என்று தேடிக் கொண்டிருப்பார்கள். இன்னும் ஒருசிலர், மேஜையில் வைத்த பொருளை, சரியாக கவனிக்காமல் இன்னும் தேடுவார்கள். சிறுவர்கள் பென்சிலையும், அழிப்பானையும் அடிக்கடி தேடுவார்கள்.

இது போலவேதான், இறை எங்கும் இறைந்து இருந்தும், நமக்குள்ளாக இருந்தும், இறைவனை என்னால் காண, அறிய முடியவில்லையே என்று புலம்புவார்கள். நாடெங்கும் இருக்கும் கோவில், குளம், மலை உச்சி என்று தேடி அலைவார்கள். தனக்குள் அகத்தவத்தால் கடந்து உள்ளே நிலைத்தால், கடவுளை காண முடியுமே!

முக்கியமாக, பக்தி என்பது, அந்த இறையை விளக்குவதற்காக ஏற்பட்ட ஒரு வழிமுறைதானே தவிர வேறொன்றுமில்லை. ஆனால் அந்த வழிமுறை அடைக்கபட்டு, மக்களை திசைதிருப்பி விட்டது ஏதோ சதி. இப்படியாக இறையை, கடவுளை காணும் உண்மை குறித்து இந்தக்கவிதை விளக்குகிறது.

வாழ்க வளமுடன்.

-----

Present by: