Virtual mistake

 காணும் காட்சிப்பிழை!

உலகில் பிறந்த எவ்வுயிரும்

மயங்கி வாழ்ந்து இணைகூடி

வாரிசு உருவாக்கி மடிகிறது

இதனாக வந்த மனிதனுமே

எல்லாம் அறிந்த மயக்கத்தில்

இதனையே செய்து வருகிறான்!

சிந்தை உயர்த்தி நான்யாரெனெ

அறிவோர் உலகில் மிகச்சிலரே!

இறப்பும் பிறப்பும் பொதுவென

கருதும் நிலையில் காட்சிபிழையே!

விளக்கம்:

#காட்சிப்பிழை என்ற வார்த்தையை நமக்கு தந்த மகான் பாரதியை நினைவு கூர்வோம்.

இந்த உலகில் தாவரம் முதற்கொண்டு எல்லா உயிரினங்களும், தன்னை பிரதி எடுக்கின்றன. தன் வாழ்க்கைக் காலம் உணர்ந்து, தாவரங்கள் மகரந்த சேர்க்கையாக கூடி, விதை தந்து தன் அடுத்த தலைமுறையை காக்கிறது. விலங்குகள் ஆண், பெண் துணை தேடி கலந்து, வாரிசு உருவாக்கி தலைமுறை காக்கிறது. அதன் தொடர் பரிணாமத்தில் வந்த மனம் இதனான மனிதனும், இன்றும் அவ்வாறே வாழ்ந்து வருகிறான்.

என்ன வித்தியாசம் இருக்கிறது? பிறக்கிறான், வளர்கிறான், படிக்கிறான், வேலை அல்லது தொழில் செய்து சம்பாதிக்கிறான், காதல் அல்லது திருமணம் வழி துணை தேடுகிறான், பிள்ளை பெற்றுக்கொள்கிறான். பிறகு இறந்தும் விடுகிறான். இதுதானே வழக்கம். ஒரு சிலவகையில் சமூக சேவை செய்கிறான் என்றே வைத்துக் கொள்ளலாம். ஆனால் தன்னை உணர்ந்தானா? ஏன் பிறந்தேன்? ஏன் வாழ்கிறேன்? ஏன் இறக்கிறேன்? என்கிருந்து வந்தேன்? எங்கே போகிறேன்? என்று தன்னை கேட்டுக்கொண்டானா?

ஒரு சிலர், நான் யார்? என்றே கேள்வி எழுப்பி, விடை அறிந்து சித்தராகவும், ஞானியாகவும், மகானாகவும் ஆனார், அவர் சொன்னதையும் பிறர் ஏற்றுக்கொள்வதும் இல்லை. ஏனென்றால், யாராக இருந்தாலும், பிறப்பும், இறப்பும் பொதுதானே? இதில் நான் என்ன? ஞானி என்ன? வித்தியாசம் என்று காட்சிப்பிழையாக நினைக்கின்றனர். ஆனால் உண்மை என்ன? என்று அன்பர்களை சிந்திக்கத்தூண்டும் வகையில் இந்தக் கவிதை விளக்கம் அளிக்கிறது.

வாழ்க வளமுடன். 

-----

Present by: