Yoga is the way, devotion does not help!

 யோகமே வழி, உதவாது பக்தி!

செய்த தவறுக்கு தண்டனை

என்பது உலகியல் வழக்கமே!

திறமை பணம் செல்வாக்கின்

பயனாக தப்பிக்க வாய்ப்புண்டு!

நீதிநெறி பிறழாத இயற்கையில்

எண்ணம் சொல் செயல்பிறழ்ந்தால்

தகுந்த தண்டனை வழங்கிடும்.

உடலால் மனதால் நோயாகிடும்

திருத்திட வழியுண்டு அனுபவித்தே!

யோகம் உடற்பயிற்சி காயகல்பம்

அகத்தவம் உறுதுணை, பக்திஉதவா!

விளக்கம்:

மனிதவாழ்வில் யார், எந்த நாட்டில் வாழ்ந்தாலும், நேர்மையாக, பிறரோடு நம்பிக்கை கொண்டு வாழவேண்டும் என்பது பொது விதி. இதில் யார் தவறு செய்தாலும் அதற்கான தண்டனை உண்டு. அதை நீதிமன்றமும், நீதி தலைவரும் உறுதி செய்வர். எப்படியான தண்டனை கிடைத்தாலும், ஒருவர் தன் திறமை, பணம், செல்வாக்கு இவற்றை பயன்படுத்தி, தண்டனையில் இருந்து தப்பிக்க வழியுண்டு.

இயற்கையோடு நாம் வாழும் காலத்திலும், அத்தகைய நேர்மையையும், நம்பிக்கையும் கடைபிடித்து வாழ்தல் அவசியமாகிறது. அப்படியல்லாது தவறு செய்தால், அவரது உடலையும், மனதையும் பாதிக்கும், நோய் உண்டாகும், உறுப்புக்கள் சிதையும், உயிருக்கும் பாதிப்பாகும். சிலவேளை அது வரும் சந்ததியினரையும் பாதிக்கும். இதை நிச்சயமாக அனுபவித்து தீர்ப்பதைத்தவிர தப்பிக்க வழியே இல்லை.

ஆனாலும், அனுபவிக்கும் காலத்திலேயே திருத்தம் பெற வழியுண்டு. எப்படியெனில், உடல் நலம் பெற உடற்பயிற்சியும், உடல், உயிர், மனம் சிறப்புற காயகல்பமும், முழு திருத்தம் பெற அகத்தவமும் பயின்று வந்தால், வாழ்நாளில் திருத்தம் பெறலாம்.

அப்படியல்லாது, பக்திவழியாக இறைவனுக்கு, இறைவிக்கு வேண்டுதல் நிறைவேற்றி சரிசெய்துவிடலாம் என்பது என்றுமே உதவாது, என்று இந்தக்கவிதை விளக்கம் அளிக்கிறது.

வாழ்க வளமுடன். 

-----

Present by: