Let us seek the blessings of the ancestors!

 முன்னோர் ஆசி வேண்டுவோம்!

நமக்கு முன்னம் மூதாதை இன்றி

இன்று நாமில்லை நம்வேர் அவர்கள்

தம்மால் முடியாத ஓர்கடமை நம்மால்

முடியட்டும் என்றே நம்மிடம் தந்தார்

தொடர் ஓட்டம் ஓடும் விளையாட்டாய்!

ஆட்டத்தை முடிக்க தொடர உரிமை

வழிவந்த எல்லோர்க்கும் உண்டு தான்,

என்றாலும் முன்னோர் ஆசியும் வேண்டும்!

விளக்கம்:

தை அமாவாசை நாளில் வெளிகிற கவிதை இதுவாகும். மகர நட்சத்திர கூட்டத்தில் இருக்கும் சூரியனோடு, சந்திரன் இணைந்து அருள்காந்த அலையை, பூவியில் இருக்கும் நம்மை நோக்கி செலுத்தும் நாள். சந்திரன் நம் மனதோடு தொடர்பு கொண்டது. அமாவாசை நாள், நம் மூதாதையர்களோடு தொடர்பு கொண்டது. அவர்களின் வழித்தொடர் நாம் என்றால், நம் வேர்கள் நம்முடைய மூதாதையர்களே!

அவர்களால் முடியாத ஏதோ ஓர் கடமை, நம்மால் முடிக்கவேண்டும் என்று, நம்மை பெற்றெடுத்தார்கள். கோ கோ என்றொரு தொடர் விளையாட்டு, ஒரு பொருளை இன்னொருவருக்கு கடத்திக் கொண்டே இருக்க வேண்டும். அதுபோல இந்த கடமையை தொடர்ந்து, அடுத்தவருக்கு வழங்கிக்கொண்டே இருக்கிறார்கள். இந்த ஆட்டத்தை முடிப்பதும், தொடர்வதும் அவரவர் முடிவே ஆகும்.

ஆனாலும், இந்த ஆட்டத்தில் உதவ, நம் முன்னோர்களும் உதவியாக இருப்பார்கள் என்பதற்காக, அவர்கள் ஆசி வேண்டி, தை அமாவாசை நாளில் விரதம் இருந்து வணங்குகிறோம். சரி அது என்ன கடமை? “நான் யார்?” என்று அறிந்து, இறை உணர்வு பெறுவதே ஆகும் என்று இந்தக்கவிதை உண்மை விளக்கம் தருகிறது.

வாழ்க வளமுடன்

-----

Present by: