The God and the tycoon

 கடவுளும் தொழிலதிபரும்

பணிபுரியும் இடங்களிலே ஆட்டுவிப்போர் யாரென்று

அறியாத நிலையினிலும் அவருக்கான மரியாதை

தவறாது தன்வேலைகளில் தவறிழைக்காத விழிப்புடன்

சேவையோடு பாராட்டும் பெறத்துடிப்பான் வேலையாள்!

அதுபோலவே மனிதனின் வாழ்வனைத்தும் கண்காணா

இயற்கையின் உன்னதத்தோடு இணைந்தே இருக்கிறது!

எல்லையில்லா அன்பும்கருணை கொண்ட மகாசக்தியை

கடவுளென்றே அழைத்து மகிழ்ந்தே வாழ்வான்பக்தன்!

விளக்கம்:

பொருளாதார உலகில் எல்லோருமே, தன் வாழ்வை நடத்துவதற்கு, எல்லோராலும் சுயமாக தொழில் செய்ய முடிவதில்லை. எனவே ஏதேனும் நிறுவனத்திற்கு வேலைக்கு செல்கிறோம். பல ஊர்களில், பல கிளைகள் உள்ள நிறுவனத்திற்கு யார் நிறுவனர், யார் தலைவர் என்பது நமக்கு தெரியாது. ஆனால் அந்த கிளைக்கு யார் மேலாளர் என்பது மட்டுமே தெரியும். என்றாலும் தன் உழைப்பும், நேர்மையும் அந்த தலைமைக்கு தெரிய வேண்டும், அதன் மூலம் தன் வாழ்க்கைத்தரம் உயர்த்தப்படும் என்றே கருதி, அந்நிறுவனத்தில் இருக்கும்வரை உண்மையாக உழைப்போம் அல்லவா? 

இப்பொழுது நாம் வாழும் வாழ்க்கையை கவனிப்போம். பிறந்தோம், வாழ்கிறோம். இறப்பு என்றோ நிச்சயம் என்றாலும் கூட, வாழும் இனிமையை அதை நினைத்து கெடுத்துக் கொண்டதில்லை. நம் வாழ்வு இந்த இயற்கையோடு ஒன்றி இணைந்திருக்கிறது. நம் பிறப்பு நம்மிடம் இல்லை, ஆனாலும் நம் வாழ்வு “ஏதோ ஒரு நிகழ்வால்” நடைபெறுகிறது. அது அன்பும் கருணையுமான பெரிய ஆற்றல் என்பதை உணர முடியும். இந்த உண்மை உணர்ந்தவன், தனக்கு மேலான அந்த மகாசக்தியை, மரியாதையோடு “கடவுளே” என்று அழைத்து மகிழ்கிறான். பக்தியை வெளிப்படுத்துவதால் அவன் பக்தன் ஆகிறான், என்பதாக இந்தக்கவிதை உண்மை விளக்கம் அளிக்கிறது.

வாழ்க வளமுடன்.

-----

Present by: