There is only one thing alone!

ஒன்றே தனித் தனியாக!

பேரறிவாய் எதுநின்றதோ அதுவே மலர்ந்திட

ஐம்பூதம் அண்டஉலகம் அதிலுயிர்கள் வந்தது!

பேராற்றல் துணையோடு தன்னை உணர்ந்திட

மனிதனாக முழுமைபெற இலக்கு அடைந்தது!

இதற்குள்ளாக தனித்தனியே பலவாறு பிரிந்தே

பாதையும் மாறிபயணித்தே சிக்கித் தவித்தது!

உணர்ந்தோரின் வழியே உண்மை உணர்ந்தால்

எல்லாம் ஓர்மூலத்தின் தன்மையாக நிலைக்கும்!

விளக்கம்:

எது இருந்ததோ, இருக்கிறதோ, இருக்குமோ, இருக்கப்போகிறதோ என்ற எல்லா நிலைகளிலும் இயல்பாகவே இருப்பது மெய்ப்பொருளாகும். இந்த மெய்ப்பொருளுக்கு 1) வற்றாயிருப்பு 2 ) பேராற்றல் 3) பேரறிவு 4) காலம் என்ற வளங்கள் உண்டு என்று, குரு மகான் வேதாத்திரி மகரிசி அவர்கள் சொல்லுகிறார். இதில் பேரறிவானது, தன்னுடைய பேராற்றலின் துணையோடும் தன்னையே உணர்ந்திட விருப்பத்தில் மலர்ந்தது.

அம்மலர்ச்சியில்தான், விண், காற்று, நெருப்பு, நீர், மண் ஆகிய ஐந்து பௌதீக தோற்றங்களும், பிரபஞ்சமும், புவியும், புவியில் உயிர்களுமாக தோன்றின. அதிலும் உச்சமாக, மன இதனான மனிதனாகவும் முழுமை பெற்றது. சிறப்பு வாய்ந்த 6ம் அறிவால், தன்னை உணர்ந்து, தான் யார் என்பதை உணர்ந்து முழுமையும் பெற்றான்.

ஆனாலும், அந்த பயணத்தில் உணர்ந்தோர், வெகு சிலரும், உணராதோர் பெரும்பாலாகவும் வித்தியாசம் வந்துவிட்டது. இதனால் பலவழிகளில் சிக்கி வாழ்க்கையில் திசை மாறிவிட்டது. இவர்கள் அனைவரும், உணர்ந்தோரின் வழியாக உண்மை வழி நடந்தால், நாம் எல்லோருமே ஒரே மூலத்தின் அங்கம் என்பது தெரியவரும் என்ற உண்மையை இந்தக்கவிதை விளக்குகிறது!

வாழ்க வளமுடன்.

-----

Present by: