Veeduperu is paramount!

 வீடுபேறே முதன்மையானது! 

சித்தர்கள் மகான்கள் நம்நாட்டின் அற்புதம்!

உலகுக்கே வழிகாட்டும் உன்னத பெரியோர்

உயிருக்குள் உறைந்த இறையை அறிவாகவே

காட்டிசித்தோடு உடலும் கூடிஉணர்ந் தறியவே

வழிகள் காட்டி சித்தாந்தம் தந்த மேதைகள்!

சொர்க்கம் நரகம் வேதப்பொய் புரட்டொழித்து

வீடுபேறை முதன்மையாக கொண்ட உன்னதம்

வழியாக வந்தபெருமை உணர்ந்தே உயர்வாய்!

விளக்கம்:

தமிழ்நாடு அதன் உன்னதம் நாம் அறியவேண்டும். உலகின் எல்லா பருவநிலைகளிலும் ஒரே மாதிரியான வெப்ப தட்ப நிலை கொண்டது நம் தமிழ்நாடு ஆகும். இதுவே நம் உடலை எக்காலத்திலும், ஏதேனும் ஒரு நோக்கத்தை நோக்கி நகர்த்த போதுமானதாக இருக்கிறது. அத்தகைய தமிழ்நாட்டில் எண்ணற்ற சித்தர்களும், அவ்வைபாட்டிகளும், யோகியர்களும், மகான்களும் உதித்தார்கள்.

தன்னை அறிந்து, அதன் வழியாக இறையும் உணர்ந்து, அதற்கு வழிகளும் தந்து நெறிப்படுத்தினார்கள். அனுபவத்தை பாடலாக வடித்தார்கள். சித் என்ற உயிரை அறிந்து, அதனோடு உறைந்த இறையை அறிவாகவும் காட்டினார்கள். உடலைப்போற்றி உயிர் வளர்க்கும் உபாயம் தந்தார்கள். அதுவே சித் அந்தம் (சித்தாந்தம்), உயிரை போற்றிக் காக்கும் முறை என்றாயிற்று.

வேதங்கள் எல்லாம் சமயபற்றுடன், சொர்க்கம் நரகம் என்று மக்களை பயமுறுத்தி வந்த வேளையில், வீடுபேறு ஒன்றே எம் குறிக்கோள் என்று கொண்டே சித்தர்கள் தம்மை மக்களோடு இணைத்துக் கொண்டனர். இத்தகைய பேறுபெற்ற இந்நாட்டில் பிறந்து வாழ்ந்துவரும் நாமும் இந்த உண்மை அறிந்து, இறைஉணர ஆர்வம் கொள்ள வேண்டும் என்று இந்தக்கவிதை உண்மை விளக்கம் அளிக்கிறது

வாழ்க வளமுடன்

-----

Present by: