Happy journey to know the mind!

 மனம் அறியும் இனிய பயணம்!

உள்முகமாய் ஆக்ஞை அழுத்தம் கூடக்கூட

உள்ளே ஓர்விழிப்பு எழுந்திட வாய்ப்பாகும்

மனமிந்த பழக்கம் இல்லா அலைபாந்திடும்

எங்கெங்கோ ஓடியோடி வந்து நின்றிடும்!

இனிபோக இடமில்லை என்றே நிலைத்திடும்!

மனமே மனதில் நிலைத்திட புலனைந்தும்

அடங்கிடத் துவங்கும் அற்புதம் நிகழ்ந்திடும்!

மனமறிய துவங்கி விட்டீர் இனிதேபயணம்!

விளக்கம்: 

குரு மகான் வேதாத்திரி மகரிசி வழங்கும், ஆரம்ப தீட்சை தொடர்ந்த முதல் தவம், ஆக்ஞை (ஆக்கினை) ஆகும். மூலாதாரத்தில் இருந்து, குண்டலி சக்தியை, நேரடியாக ஆக்ஞையில் நிறுத்து தவமியற்றுகிறோம். ஆரம்ப காலங்களில் ஏதோ கண்மூடி அங்கே கவனிக்கிறோம் என்றே தோன்றும். தினமும், ஆர்வமாக, விடாமுயற்சியாக கவனிக்க அங்கே, உள்முகமாக அழுத்தம் கூடிட உணரலாம். கண்மூடி ஏதோ ஒன்றை விழிப்பாக கவனிக்கிறோம் என்பது நமக்கு தெரியவரும்.

இதுவரையிலும் மனதை, வெளியிலே, புற விசயங்களிலே ஒட விட்டு பழகியதால், இந்தப் பழக்கத்தை மனம் ஏற்றுக்கொள்ளாது என்பதும் உண்மை. இதனால் வழக்கத்தை விட இன்னும் அதிகமாக அலைபாயும். ஓடி ஓடி களைத்துப்போனதுப்போல், சரி வேறு வழியில்லை, இனி இதை கவனிப்போம் என்று மனவே, ஆக்ஞையில் நிற்கத்துவங்கும். மனமே மனதை கவனிக்கும் அற்புதம் இது!

மேலும் அற்புதமாக, அலைபாய்ந்து கொண்டே இருந்த மனம், சிறிய காலமாவது, ஒரிரு நொடியாவது நிலைத்து நிற்க துவங்கும். எத்தனையோ காலத்தில் நடக்காத ஒன்று, இப்பொழுது நிகழ்ந்துவிட்டதே! அதிசயம் தானே?! இனி என்ன? உங்களின் இறைப் பயணம் தொடங்கிவிட்டது. இவ்வாறாக இந்தக்கவிதை மனம் வழியாக, தவத்தில் இறைப்பயணம் தொடங்கியதை விளக்குகிறது.

வாழ்க வளமுடன்.

-----

Present by: