Let us know the truth!

 நாம் உண்மை அறிந்திடுவோம்!

வெளிச்சம் நோக்கி பறக்கும் விட்டில்

நெருப்பே என்றே அறியாது உட்புகும்

அதுபோல மனம் தவத்தில் விரியவிரிய

எல்லாம் கடந்து வெளியில் கலந்திடும்

நெருப்பிலே நெருப்பு இறையிலே மனம்

விட்டிலுக்கு திரும்பிட வாய்ப்பு இல்லை

உணர்ந்த நாம் உண்மை அறிந்திடுவோம்

இறையே அறிவான மனமான உண்மை!

விளக்கம்:

ஒரு நெய் தீபம் எரியும் பொழுது, எங்கிருந்தோ விட்டில் பூச்சி பறந்து வந்திடும். அடிக்கடி நெருப்பை நோக்கி பாயும். நெருப்போடு இணைந்து எரிந்தும் போகும். பரிதாபமாக இறந்தும் விடுகிறது. திரும்பு உயிர்வாழ்ந்திட அதற்கு வாய்ப்பும் இல்லை. இந்த விட்டில் பூச்சி போலவே, நாம் இறை அறிய அகத்தவம் செய்கிறோம். அதற்கு தகுந்த குரு உதவுகிறார். அவர் காட்டிய வழியில், தவத்தில் மனம் விரிய விரிய, இந்த உலகம், நட்சத்திர மண்டலம், அதற்கு அப்பால் உள்ள பிரபஞ்சம் முழுதும் கடந்து, வெட்டவெளி எனும் சிவகளத்தில் நிலைக்கிறது.

சிவகளத்தில், விட்டில் பூச்சி நெருப்பில் புகுந்தது போல, இந்த மனம் ஒன்றோடு ஒன்றாக கலந்துவிடுகிறது. ஆனால் ஓர் அதிசயமாக, உணர்வு வந்து நாம் தவம் செய்து கொண்டிருப்பதை உணர்ந்து சகஜமான வாழ்வுக்கும் வந்துவிடுகிறோம். மேலும் முக்கியமான உண்மைகளையும் தெரிந்து கொள்கிறோம். அது என்ன? இறையே அறிவாக, மனமாக இருப்பதையும், இயற்கையாக, உயிர்களாக, பொருட்களாகவும் இருப்பதையும் அறிகிறோம். இத்தகைய அற்புத நிகழ்வு தவத்தால்தான் நடைபெறுகிறது, என்ற இந்த உண்மையை இந்தக்கவிதை நமக்கு விளக்கமாக தருகிறது.

வாழ்க வளமுடன்.

-----

Present by: