Perfect Time and Place to do Penance!

 தவம் இயற்ற தகுந்த நேரமும் இடமும்!

எத்தவமும் இயற்றிட தகுந்த நேரமெது?

அதிகாலை சூழலின் அமைதி தகுந்தது

மாலைக்கும் அதுபோல சிறப்பு உண்டு

திசைதிருப்பும் ஒளிஒலி கழிக்க சிறப்பு

தனியே ஓர்ரறை இருந்தால் மிகநன்று

வருவோர் போவோர் இருப்பது வேண்டா!

திறந்த வெளியோ இருட்டறையோ ஏதும்

இல்லாகூரை நல்காற்று ஊட தவம்செய்வீர்!

விளக்கம்:

தினமும் தவம் இயற்ற தகுந்த நேரம் எது? என்ற கேள்விக்கு, அதிகாலை 4.30 மணி முதல் 6 மணி  வரை எனலாம். சிலருக்கு 3.30 முதல் 7.30 வரையும் கூட பொருத்தமானதே. இதே நேரத்தை மாலை நேர தவத்திற்கும் எடுத்துக் கொள்ளலாம். ஏனென்றால் அந்த அதிகாலை நேரம், ஒரு நாளின் மலர்ச்சியாக அமைதியாக இருக்கும். அந்த அமைதி தவத்திற்கு உதவும். அதுபோலவே மாலை என்பது, அடங்குகின்ற நேரம். அந்த நேரமும் பூரிப்பாக, அமைதியாக இருக்கும்.

தவம் இயற்றும் பொழுது, நம்மை சுற்றியுள்ள சூழ்நிலைகளையும் கவனத்தில் கொள்ளவேண்டும். மனிதர்களின் பேச்சொலி, நாய், பூனை இவைகளின் ஒலி, வாகனங்களின் ஒலி, இரைச்சல் இப்படி ஏதும் நம்மை பாதிக்காதவாறு, தகுந்த இடத்தில் அமரவேண்டும். மேலும் அதிகமான, நேரடியான சூரிய ஒளி, மின்சார விளக்கு ஒளி, வெளிச்சம் ஆகியன உங்கள் உடலிலும், கண்ணிலும் படாதவாறு அமரவேண்டும்.

தனி அறை கிடைத்தால் நல்லது. அந்த அறையிலும், பிற மனிதர்கள் வருவதும், போவதுமாக இருக்கக்கூடாது. திறந்தவெளியிலும், இருட்டான இடங்களிலும் தவம் இயற்றக் கூடாது. மேற்கூரை இருக்கவேண்டும், நல்ல காற்று வந்துபோக வேண்டும் அப்படியான இடங்களே, தவம் செய்ய பொருத்தமானவை என்று இந்தக்கவிதை விளக்கம் அளிக்கிறது.

வாழ்க வளமுடன்.

-----

Present by: