Anyone will come to support!

 எவரும் நமக்கு துணையாக வருவார்!

தவத்தால் சிந்தனை தெளிவு திடம்

கிடைத்திட வாழ்வில் திருத்தம் பெற

ஆவல் எழுந்திடும் தான் குடும்பம்

சுற்றம் உலகம் என்றே வரிசையில்

மேன்மை பெறவே செயல் உழைப்பு

அமைய வெற்றி எளிதாய் கிட்டிடும்

அன்பு பண்பு கருணை ஓங்கிடவே

எவரும் நமக்கு துணையே நிற்பார்!

விளக்கம்:

ஒருவர், தவம் கற்றுக்கொண்டால் என்னென்ன சிறப்பு என்பதை, அனுபவித்து தெரிந்தால்தான் நல்லது. வார்த்தைகளால் விளக்கினாலும் அதை புரிந்துகொள்வது கடினம். இதெல்லாம் நடக்குமா? என்ற எதிர்ப்பு எண்ணத்தில்தான் அதை பிறர், தவம் அறியாதோர் கேட்பார்கள். ஆனால் இதையெல்லாம் அவர்கள் கோவிலுக்கு, ஆலயங்களுக்கு சென்று இறையிடம் முறையிடுவார்கள். தவம் கற்றவர்களுக்கு அப்படியில்லை. மனம் இயற்கையின் தன்மையோடு இணைந்து இயங்க எல்லாம் தானாக கிடைக்கும்.

தவம் கற்ற சாதகர், இதுவரையிலும் தன் வாழ்க்கையில் இருக்கின்ற துன்பங்களை, தவறான செயல்களை திருத்தம் பெற சிந்தித்து வழி கண்டடைவார். அதற்கான செயல்முறைகளை ஆர்வமோடு செயல்படுத்துவார். முதலில் தன்னை உயர்த்திக்கொள்வார், பிறகு குடும்பத்திற்கான நலன்களை செயல்படுத்துவார். அதற்கடுத்து நண்பர்கள், உறவுகள் இவர்களுக்கு உதவ தயாராவார். அதன்வழியே இந்த உலகுக்கும் நன்மை தரத்தக்க செயல்களை தர விரும்புவார். இத்தகைய மாற்றங்களில் அவருக்கான வெற்றி எளிதில் கிடைக்கும்.

ஏனென்றால், தன்னுடைய எண்ணங்களில், செயல்களில் அன்பும், பண்பும், கருணையும் கொண்டு செயல்படுகிறார் என்பதாலும், சுயநலம் கருதாது இருப்பதாலும், அவரைச் சார்ந்தவர்கள் மட்டுமல்ல, பல புதிய நபர்களும் அவரோடு துணை நிற்பார்கள், உதவியும் செய்வார்கள். இத்தகைய உண்மைகளை இந்தக்கவிதை விளக்கமாக தருகிறது.

வாழ்க வளமுடன்

-----

Present by: