Therefore you will do meditation, be perfect!

 ஆகையினால் தவம் செய்வீர், உயர்வீர்!

தன்னை யாரென்று அறிந்திட்ட சித்தர்கள்

பாமரர்க்கு தருவித்த உருவமே இறைவன்!

இறையை நினைத்தாலே அதுவாக மாறும்

அற்புதம் இருக்கையில் அதைக் கொண்டு

மக்களை ஏமாற்றி இருப்பதைப் பறிக்கவே

நோக்கம் கொண்டு இடையில் தடையானார்!

அவர்சொன்னதே சொர்க்க நரககதையாம்!

காலப் போக்கில் மாயைவிலக ஞானியர்தந்த

அற்புதக் கலையே யோகமும் தவமுமாகும்!

கற்றுத் தேர்வீர் உண்மையறிந்து உயர்வீர்!

விளக்கம்: 

உலகில் மனிதனின் வளர்ச்சி, திடீரென்று வந்துவிடவில்லை. ஆயிரக்கணக்கான ஆண்டுகளாக, பிற உயிர்களோடு உயிர்களாய், விலங்குகளின் குணம் கொண்டே வாழ்ந்து வந்தார்கள். ஆனால், இயற்கையின் உந்துதலால், சிந்தனை உயர்ந்த மனிதன், தன் நிலை உணர்ந்து, தனக்கும் பிற உயிர்களுக்கும் உள்ள பொருத்தங்களையும், அறிவின் உயர்வையும் கண்டான். அந்த வழியில்தான் “நான் யார்?” என்ற கேள்வியின் உந்துதலுக்கு உள்ளானான். அந்த தேடலில் முழுமை கண்டவர்களே சித்தர்கள்.

சித்தர்கள், மூலமான ஒன்றே எல்லா பொருட்களாகவும், உயிர்களாகவும், சிந்தனை உயர்ந்த மனிதனில் அறிவாகவும், தனையே அறிந்துகொள்ளும் பயணத்தில் நிறைவு பெற்றிருப்பதையும் உணர்ந்தார்கள். அந்த மூலத்தை அவர்கள் இறை என்றும், கடந்து உள்ளே பார் என்பதாக கடவுள் என்றும் பாமரர்க்கு சொல்லி வைத்தார்கள். அதற்கு உருவமும் கொடுத்தார்கள்.

மனித மனம், எதை நினைக்கிறதோ அதுவாகமாறியும் அற்புதம் அறிந்தவர்கள் சித்தர்கள். ஆனால் சிலர், அந்த உண்மையை மறைத்து, மக்களை ஏமாற்றி பணம், பொருள் எல்லாம் பறிக்க திட்டமிட்டு, இடையில் நின்று கொண்டார். சொர்க்கம் நரகம் கட்டுக்கதை சொல்லி பயமுறுத்தினர்.

ஆனால், விஞ்ஞானம் வளர, மக்கள் இதெல்லாம் கட்டுக்கதை என்பதை தெரிந்துகொண்டனர். துரதிர்ஷ்டவசமாக இறையும், கடவுளும் கூட கட்டுக்கதை ஆகிவிட்டது. இதனால் மனிதனின் வாழ்க்கை திசை மாறிட, வாழ்வில் துன்பமே கண்டு வருந்துகிறான். இந்த வருத்தங்களை போக்கவே ஞானியர்கள் பிறந்து, வாழ்ந்து கண்ட உண்மை விளக்கமாக, மீண்டும் சித்தர்களின் யோகத்தையும், தவத்தையும் தந்தார்கள். “நான் யார்?” என்ற வினாவின் விடையறிய, பிறப்பின் கடமை உணர், தவம் கற்றுத்தேர்ந்து, வாழ்வில் விளக்கம் பெற்று உயர்வீர்களாக, என்ற உண்மையை இக்கவிதை அளிக்கிறது.

வாழ்க வளமுடன்.

-----

Present by: