Thuriyatheetha makes eternal by cleared the karma

வினைஅறுத்து வீடுபேறு தரும் துரியாதீதம்!

கடல்தேடி சங்கமிக்கும் ஆறுபோல் தவத்தில்

மூலம் நோக்கி நிறைவடைவதே துரியாதீதம்!

எத்தனையோ பிறவிவழி கூடிவந்த நாள்வரை

பிறவியில் பெற்றிருந்த பழபுது வினைகளும்

கரைந்தே தீர்ந்திடும் இனிவிழிப்பில் ஏதுமெழா!

முற்பிறவி கடன்தீர பிற்பிறவி சுமைஏதுமில்லை

கருமைய ஆன்மா களங்கமில்லை வீடுபேறே!

விரிந்துநின்றது மனம் ஒழுக்கம்கடமை ஈகையால்!

விளக்கம்:

ஆறு தொடங்கிய இடத்திலிருந்து, எத்தனையோ பள்ளம் நோக்கி நகர்ந்தாலும் கூட, கடலோடு சங்கமிக்காமல் நிறைவு பெறுவதில்லை. ஆறு கடலாகிவிட்டது என்பது பொருத்தம். அதுபோலவே, மனிதன் தன் மூலம் எது என்று அறியும் தேடலில் மூலத்தோடு ஒன்றி இணையும் வாய்ப்பை உருவாக்கித் தருவது துரியாதீத தவமே ஆகும். அங்கேதான் மனிதப்பிறப்பு நிறைவடைகிறது.

இதுநாள்வரையில், எத்தனையோ பிறவியின் வழியாக, கருத்தொடரால் தொடந்து வந்த பழவினை, புதுவினை இரண்டுமே  (கர்மா), துரியதீத தவத்தின் நிலையால் கரைந்துவிடும். இனி ஏதும் வினைகள் எழாத விழிப்புணர்வு கிடைத்திடும். இதன்காரணமாக, முன்பிறவியில் பெற்ற கடன் தீர்ந்துவிடும், இனிவரும் பிறப்பில் எச்சுமையும் இருக்கப்போவதில்லை.

மிக முக்கியமாக, கருமையம், ஆன்மா களங்கம் இல்லாத நிலை ஏற்பட்டுவிடும். வாழும் காலத்திலேயே இறை உண்மை உணர்ந்ததால், சித்தர்கள் சொன்ன வீடுபேறு கிடைத்துவிடும். இனி வாழும் காலத்தில், வாழ்வில் மனம் விரிந்து நின்று  சித்தர்களின் வாழ்க்கை முறையான, ஒழுக்கம், கடமை, ஈகையில் சிறந்து விளங்கிடும். இத்தகைய மேன்மைகளை இந்தக்கவிதை விளக்கமாக தருகிறது.

வாழ்க வளமுடன்

-----

Present by: