To know all that exists!

 இருப்பதெல்லாம் அறிவதற்கு!

இருப்பது எல்லாம் இருப்பதால் தெரிகிறோம்

பிறப்புக்கு முன்நாம் எங்கே பதில்தருவரோ?

இருப்பது எல்லாம் இருப்பதால் அறிவதற்கு

துணையாக வருவது நம்மனமே உண்மை!

அம்மனதை மனதாலே விரித்துப் பழகிடவே

தகுந்ததோர் வழிஅகத் தவமே உதவிடும்!

விரிந்து தேடத்தேட கிடைக்கும் விடையென்ன?

தேடிய பொருளே தனக்குள் என்பதேயுண்மை!

விளக்கம்:

இந்த உலகில் பிறந்த காரணத்தினால் தான், பெற்றோரை, பிறரை, மக்களை, இந்த இயற்கையை, பிரபஞ்சத்தை தெரிந்து கொள்கிறோம். பிறப்புக்கு முன்னே நாம் எங்கே இருந்தோம் என்பதற்கு பதில் இல்லை. இறந்தபிறகு என்ற கேள்விக்கே இடமும் இல்லை. எனவே, வாழ்ந்துகொண்டிருக்கிற காலத்தில், இருப்பதெல்லாம் அறிந்துகொள்ள வேண்டும் என்ற ஆவல் எழுவது இயல்பே. எதனைக்கொண்டு அறிவது? மனதைக் கொண்டுதான் அறிய வேண்டும், அதுவே துணை.

அத்தகைய மனதை, விரிந்த நிலையில் வைத்து பழகிட, குருவின் துணையால் கற்றுக்கொண்ட அகத்தவமே உதவிடும். அந்த வழியில், தவத்தில் படிப்படியாக மனதை விரித்து பழக, கிடைக்கும் விடை என்ன தெரியுமா? அந்த மெய்ப்பொருள், தனக்குள்ளாகவேதான் இதுவரையில் இருந்தது என்ற உண்மையை அறிந்துகொள்வோம். இக்கருத்தைத்தான் குருமகான் வேதாத்திரி, தெய்வமே அறிவாக இருக்கிறது என்று குறிப்பிடுகிறார். கட உள் என்ற வார்த்தையின் உண்மையும் இதுவே. இத்தகைய உண்மை விளக்கத்தை இந்தக்கவிதை விளக்குகிறது.

வாழ்க வளமுடன்

-----

Present by: