What are the methods of initiation in kundalini yoga ? For what?

 தீட்சை முறைகள் என்ன? எதற்கு?

குண்டலினி யோக தவ தீட்சையில்

குருவழங்கும் முறை மூன்று உண்டு

தொட்டு பார்த்து ஞானவழி ஆகிடும்!

ஆக்ஞை அது தொட்டு உயர்த்துதல்

துரியம் அது பார்த்து உணர்த்துதல்

துரியாதீதமோ ஞான தீட்சை ஆகும்!

எதோன்று எல்லாம் ஆனதோ அதை

அறிவதற்கு உணர்வதற்கு ஏற்ற வழி!

விளக்கம்:

உயர்ந்த குருவை சரணடைந்து, குண்டலினி யோகம் கற்க விருப்பம் தெரிவித்தால், நம் விருப்பம் உணர்ந்து தீட்சை அளிக்க குரு ஒத்துழைப்பார். உலகெங்கிலும் உள்ள தவ மையங்களில் பலவிதமான தீட்சை முறை உண்டு. ஆனால் வேதாத்திரியத்தில், மூன்று வகையான தீட்சை முறைகளை, குரு மகான் வேதாத்திரி மகரிசி அமைத்திருக்கிறார். அவை வடமொழியில். ஸ்பரிச தீட்சை, சட்சு தீட்சை, மானச தீட்சை என்று அழைக்கப் படுகிறது. இவை தமிழில், தொடு தீட்சை, பார்த்தல் தீட்சை, ஞான தீட்சை என்பதாகும்.

ஆக்கினை என்பது தொட்டு உயர்த்தித் தரும் தீட்சை, துரியம் என்பது குரு நம் எதிரே அமர்ந்துபார்வையால் தீட்சை அளித்து பிறகு, தொட்டு உணர்த்தும் தீட்சை, துரியாதீதம் என்பது குரு நம் அருகே அமர்ந்து ஞானத்தால் வழங்கும் தீட்சை ஆகும். இத்தனை தீட்சை முறைகள் எதற்காக? இந்த பிரபஞ்சம் முதல், ஐம்பூதம், இயற்கை, தாவரம், புழு, பூச்சிகள், ஊர்வன, பறப்பன, நடப்பன வரையும், மனிதனாகவும் எது பரிணாமத்தால் ஒன்றிலிருந்து ஒன்றாக மலர்ந்திருக்கிறதோ அந்த ஒன்றை, அறிவதற்கும், உணர்வதற்கும் ஏற்ற வழியாக, குருவானவர் நமக்கு இந்த தீட்சையை அளிக்கிறார். இத்தகைய விளக்கத்தை இந்தக்கவிதை நமக்கு வழங்குகிறது

வாழ்க வளமுடன்

-----

Present by: