Observe the path of the mind!

 மனம் செல்லும் பாதை கவனிப்பீர்!

மனதின் உயர்வே மனிதனின் உயர்வாகிறது

மனதின் மதிப்பே மனிதனின் மதிப்பாகிறது

மனதின் இயல்பே மனிதனின் இயல்பாகிறது

மனதை மதித்து நல்லனபெற கவனம்தேவை!

மனதில் எழும் எண்ணங்கள் தானாகவரலாம்

மனம் கொண்ட ஆர்வத்திலும் உண்டாகலாம்

மனதை விழிப்பு நிலையில் ஆராய்ச்சியோடு

மனம்போன போக்கில் போகாதிருக்க காப்பீர்!

விளக்கம்:

ஒரு மனிதன் நல்லவனா என்பதை, பார்த்த உடனே தெரிந்து கொள்ள முடியுமா? அதில் பெரிய தோல்விதான் கிடைக்கும். அழுக்கே காணத ஆடையுடுத்தியவர், கீழ்த்தரமானவராக இருக்கலாம். சுத்தம் என்றால் என்னவென்றே அறியாதவர் நல்லவராக இருக்கலாம். எனவே இங்கே வெளித்தோற்றம் மனிதனின் தரத்தை சொல்லுவதில்லை. அந்த மனிதரின் செயல், நடவடிக்கை, பேச்சு இவைதான் முடிவுசெய்கின்றன. அதாவது அவனுக்குள் இருக்கும் “மனதின்” வெளிப்பாடுதான் அவனை யார் என்று காட்டுகிறது.

இதனால்தான் மனதின் உயர்வே மனிதனின் உயர்வாகிறது, மனதின் மதிப்பே மனிதனின் மதிப்பாகிறது, மனதின் இயல்பே மனிதனின் இயல்பாகிறது என்று சொல்லப்படுகிறது. தன் மனதை மதித்து, நல்லதை கொடுக்கவும், பெறவும் கவனம் வேண்டும். பொதுவாக மனதில் இயல்பாகவும் எண்ணங்கள் வரும், நாமாகவும் ஆர்வத்தால் எண்ணலாம். எப்படியாயினும் எழும், ஏற்படுத்தும் எண்ணங்களின் தரம் உயர்வானதாக இருக்க வேண்டும். “உள்ளுவதெல்லாம் உயர்வுள்ளல்” என்ற திருக்குறளை இங்கே நினைவு கூறலாம். இந்த நிலைக்கு எப்போதும் எண்ணங்கள் குறித்த ஆராய்ச்சியில் ஈடுபட வேண்டும். இதனால் மனம் போன போக்கில் சிக்கி வழிமாறாலிருக்கவும், நாம் மதிப்பு உயர்வாக இருக்கவும் வழி ஏற்படும் என்பதாக இந்தக்கவிதை விளக்கம் அளிக்கிறது!

வாழ்க வளமுடன்

-----

நன்கொடைகள் (Donate) வழங்க:

GPay: 9442783450@okhdfcbank
WhatsApp: 9442783450.wa.qvi@wahdfcbank
Bhim UPI: 9442783450@upi
PhonePe: 9442783450@ybl

Present by: