The kids game with absolute space and almighty!

 வெட்டவெளியும் சிறுபிள்ளை விளையாட்டும்!

தனக்குமீறிய ஆற்றல் அதனையே இறைஎன்றுணர்ந்து

அதனையறிய எழுந்தமுயற்சி மனதை கண்டுகொண்டது!

மனதைஅதன் இயல்பிலிருந்து விலக்கி தன்னொடுக்கத்தில்

வெட்டவெளிக் காட்டிட்ட உண்மையறிந்தவர்கள் சித்தர்களே!

இவ்வுண்மை மறைத்து அதையோர் உருவமாக்கிகோவிலில்

படைத்தோன் ஆக்கிபூசை வேண்டுதல் மகிழச்செய்தலென்று

உண்மைக்குப் புறம்பானகதையோடு மனமாற்றல் தாழ்த்தி

சிறுபிள்ளை விளையாட்டாய் மனமகிழ்தல் மாறிடவேண்டும்!

விளக்கம்:

மனிதன் தன் சிந்தனையை பின்னோக்கி நகர்த்தினால் எப்படி, மனிதனின் மனம் உணர்ந்து கொள்ளப்பட்டிருக்கும் என்பதை அறியமுடியும். இந்த இயற்கையின் செயல்பாடுகளைக் கண்டு, அஞ்சி, தனக்கு மீறிய ஏதோ ஒரு ஆற்றல் தனக்கு மேலிருந்து நடத்துகிறது என்று சிந்தித்திருப்பான். அந்த விரிந்த சிந்தனை, அதற்கான முயற்சி, தனக்குள் மனம் என்ற ஒன்றை காட்டிவிட்டது. மேலும் அவன் சிந்தனை வளர வளர, மனம் என்பது என்ன என்பதை அறியத்தொடங்கி, அதன் வழியே அப்பெரும் ஆற்றலையும் அறிய முயற்சித்தான்.

மனதை அதன் இயல்பான, நிலைத்து நிற்காத நிலையை மாற்றி, தனக்குள்ளேயே ஒடுங்கும் பயிற்சியால் வெற்றிபெற்று, அப்பெரும் ஆற்றலை வெட்டவெளியாக, இறையாக கண்டு உண்மை அறிந்தவர்கள் சித்தர்களே ஆவார். அவ்வுண்மையை எளியமக்களுக்கு உணர்த்திடவும் செய்தார்கள். ஆனால், மக்கள் தெளிவு பெறுவதை விரும்பாத சிலர், அவ்வுண்மை மறைத்து, வெட்டவெளிதத்துவத்தை இறைவனாக்கி, படைத்தவன் என்றும் மாற்றி, அவனுக்கு குடும்பத்தையும் உண்டாக்கி விட்டார்கள். மனிதன் அந்த இறைவனுக்கு, பூசை, வேண்டுதல் செய்து மகிழச்செய்ய வேண்டும். இல்லையேல் அவன் பிறவி துன்புறும் என்றும் உண்மைக்கு புறம்பான கதை கட்டிவிட்டார்கள். இதையும் மக்கள் பன்னெடுங்காலமாக, சிறுபிள்ளை விளையாட்டாக, மனமகிழ்ந்து செய்துகொண்டே வருகிறார்கள். இன்னமும் அவர்கள் துன்பம் விலகினபாடில்லை, உண்மை இறைதத்துவமும் புடிபடவில்லை. இந்த நிலை மாறிடவேண்டும் என்ற விளக்கத்தை இந்தக்கவிதை நமக்குத்தருகிறது.

வாழ்க வளமுடன்.

-----

நன்கொடைகள் (Donate) வழங்க:

GPay: 9442783450@okhdfcbank
WhatsApp: 9442783450.wa.qvi@wahdfcbank
Bhim UPI: 9442783450@upi
PhonePe: 9442783450@ybl

Present by: