Do we know the thought arising out of the situation?

 சூழ்நிலையால் எழும் எண்ணம் அறிவோமா?

தான்வாழும் இடங்களில் தன்னையொத்த மற்றோர்

ஏற்கும்நிலையை தானும்மேற்று நடக்க சூழ்நிலை

எண்ணமே காரணம். தன்னைபிறர் என்னைப்பற்றி

என்னநினைப்பரோ என்றதூண்டலும் காரணம் ஆகும்!

விரும்பியும் விரும்பாமலும் ஏற்கின்ற எண்ணமது!

நன்மைதீமை இரண்டுமே விளைவாக வந்திடுமே!

தீமைதரும் எண்ணம்விலக்கி உறவுகெடா நிலையில்

ஒதுங்கிவிடுதல் நன்றேவிழிப்பாக இருந்து தேர்வீர்!

விளக்கம்:

இதுவரை தேவை, பழக்கம் இவற்றால் எழும் எண்ணங்களையும், அதன் செயல்விளைவுகளையும் கண்டோம். இக்கவி சூழ்நிலையால் எழும் எண்ணங்கள் குறித்து சொல்கிறது. இனி பார்க்கலாமா?!

உதாரணமாக, உங்கள் நண்பரின் திருமணவிழாவிற்கு போகிறீர்கள். அங்கே அசைவ உணவுவகைகள் ஏராளம். யோகத்தில் வந்தபிறகு சைவ உணவு மட்டுமே உண்பேன் என்ற கொள்கை உள்ளவர். ஆனால், இங்கே, சைவ உணவே இல்லை. உங்களால் மறுக்கவும் முடியாது. மறுத்தால் என்ன நினைப்பார்களோ என்றும் எண்ணுகிறீர்கள். குழப்பமும் கொள்கிறீர்கள். மனமும் உடலும் ஒருமாதிரியான பொருந்தா நிலை. உள்ளூர, ஏற்கனவே அசைவம் சாப்பிட்ட உணர்வுகள் தூண்டப்படுகின்றன. மறுக்க முடியாமல் சாப்பிட்டீர்கள். ஆனால் உடலுக்கு பொருந்தாமல் மறுநாள் வயிற்றுவலி. ஏன்? சூழ்நிலை தந்த எண்ணங்களே!

யோக நூல்கள் சில வாங்க ஆர்வம், ஆனால் வாய்ப்பு அமையவில்லை. ஏதோ வேலையாக சென்னை செல்கிறீர்கள். அங்கே இருக்கும் உங்கள் நண்பர் இருக்கும் இடத்திற்கு அருகே, புத்தக கண்காட்சி நிகழ்கிறது. உடனே நூல்கள் வாங்கும் எண்ணம் எழுகிறது. வேலையை எப்படியோ சீக்கிரம் முடித்துவிட்டு, புத்தக கண்காட்சி சென்று, வாங்க நினைத்த எல்லா நூல்களும் வாங்கியும் விட்டீர்கள். இது நன்மையில் முடிந்த சூழ்நிலை எண்ணமாகும்.

சூழ்நிலை எண்ணங்கள் நன்மை, தீமை இரண்டும் ஏற்படுத்தும். இத்தகைய சூழ்நிலை எண்ணங்களை விழிப்புடன் ஆராய்ந்து, தனக்கு மனதாலும், உடலாலும் ஏற்பில்லை என்றால், உறுதியாக விலக்கிவிட வேண்டும். அந்த சூழ்நிலையைவிட்டும் அகன்றிட வேண்டும். நான் அதிலெல்லாம் சிக்கிடமாட்டேன் என்று நினைத்தாலும் கூட, யாரோ ஒருவரின் அருகாமை உங்களை சிக்கவைத்துவிடும் என்ற உண்மையை இந்தக்கவிதை தருகிறது.

வாழ்க வளமுடன்.

-

நன்கொடைகள் (Donate) வழங்கி ஊக்கப்படுத்தலாமே?!:

GPay: 9442783450@okhdfcbank
WhatsApp: 9442783450.wa.qvi@wahdfcbank
Bhim UPI: 9442783450@upi
PhonePe: 9442783450@ybl

Present by: