Do we know the thought that arises out of the impulse of others?

 பிறர்மன தூண்டுதலால் எழும் எண்ணம் அறிவோமா?

பொருளாதார மிகுஇவ்வுலகில் இவரால் எனக்கென்ன

லாபமென்றே பழகிடுதல் காண்கிறோம் அடுத்தவரை

முடிந்தவரை எமாற்றியும் பிழைத்தல் நடக்கிறதுதான்!

இவராஅவரா என்றேபணம் கொண்டுவாங்கச் செய்து

தேவையளவு பயம்னும்மீறி பொருளைக் குவித்திடவே

தூண்டுகிறார் தன்மனஎண்ண அலைகளால் தினமும்!

அரசுகட்சி தொழில்நிறுவன தலைவர் ஊழியரெல்லாம்

இத்திறமை கூடுதலாக பெற்றவர்தாம் கவனம்கொள்க!

விளக்கம்:

நாம் வாழ்கின்ற உலகில், நகரம், கிராமம் வித்தியாசமின்றி, பொருள் முதல்வாத நிலைக்கு சிக்கிவிட்டது. இரண்டு நபர்கள் பேசினால் கூட ஏதாவது, வியாபரம் தேறுமா? இவரால் எனக்கு பணம் உண்டாக்க முடியுமா என்றுதான் நினைக்கிறார்கள். சில நட்புக்கள் அதன் அடிப்படையிலும் அமைத்துக் கொள்கிறார்கள். அந்த அளவிற்கு பிறர் மனதை ஆளுமை செய்யும் திறமை கொண்டவர்களாக இருக்கிறார்கள். நல்ல விசயத்திற்காக என்றால் தவறில்லை. ஆனால் சுயலாபத்திற்காக மற்றவரை பலி ஆடாக மாற்றுதல் எவ்வகையில் சரியாகும்?

எப்போதுமே மகரிசி சொல்லும் இரு உதாரணம், காண்போமா?! ஒரு சந்தைக்கு செல்கிறீர்கள், நவீன காலத்தில் ஒரு மால் என்று வைத்துக் கொள்ளலாம். அங்கே புதுவகை துணிகள் கடை விரிக்கப்பட்டிருக்கின்றன. எல்லோரும் பார்த்து கடந்து போகிறார்கள். ஆனால் நீங்கள் அருகில் சென்றவுடன், அதை பார்க்க தோன்றுகிறது. கடைக்காரன் தேனொழுக பேசி நல்ல பெருந்தொகையை கறந்துவிட்டான். மால் விட்டு வெளியே வரும்போதுதான். இதை எதற்காக வாங்கினேன்? இதே கலரில் ஏற்கனவே நிறைய இருக்கே? வீட்டுல திட்ட போறாங்க! என்று புலம்புகிறீர்கள்.

இதைப்போலவே ஒரு பழக்கடை அருகில் செல்கிறீர்கள். கடைக்காரன் அப்படி இப்படி பேசி நல்ல மாம்பழம், ஆப்பிள், ஸ்டாபெர்ரி என்று வகையாக வாங்கிவிட்டீர்கள். வீடு திரும்பொழுதுதான் ஞாபகம் வருகிறது, வீட்டில் எல்லோரும் ஊருக்கு போய்விட்டார்கள். இந்த நிகழ்வுக்கு காரணம், அந்த கடைக்கார்கள், யாரவது வந்து வாங்க வேண்டும், இவராவது வாங்கிவிடுவார் என்று தங்கள் எண்ணத்தை, உங்கள் மீது திணித்துவிட்டார்கள். நீங்கள் மனதில் உறுதி இல்லாதபடியால் வலையில் சிக்கிவிட்டீர்கள்.

இப்படியான பிறர்மனத் தூண்டுதல், அரசாங்க அளவிலும், கட்சி அளவிலும், தொழில் நிறுவனங்களிலும், தலைவர், ஊழியர், தொண்டன் என்ற நிலைகளிலும் செய்படுகிறது என்பதை மறவாதீர்கள். நீங்கள் விழிப்புடன் இல்லையென்றால், உங்களை அவர்கள் ‘பிறர்மன தூண்டுதலால்' பயன்படுத்திக் கொள்வார்கள் என்பது உறுதி என்ற உண்மை விளக்கத்தை இந்தக்கவிதை சொல்லுகிறது.

வாழ்க வளமுடன்

-

நன்கொடைகள் (Donate) வழங்கி ஊக்கப்படுத்தலாமே?!:

GPay: 9442783450@okhdfcbank
WhatsApp: 9442783450.wa.qvi@wahdfcbank
Bhim UPI: 9442783450@upi
PhonePe: 9442783450@ybl

Present by: