Kadavul - The meaning of Go-inside

கடவுள்

🔎Click image and see it Big size

இந்தக்கவிதை, என்னுடைய உண்மை விளக்க அனுபவங்களுக்குப்பிறகு எழுதிய கவிதையாகும். மூன்று ஆண்டுகளுக்கு முன்பாக எழுதி, பேஸ்புக்கில் (Facebook) வெளியிடப்பட்டது. அதற்கான விளக்கம் இங்கே காணலாம்!

விளக்கம்:

கடவுள் என்பது என்ன? தெரியாவிட்டாலும், கடவுள் என்ற வார்த்தையும், அதற்கு நாம் தரவேண்டிய மரியாதையும், வணக்கமும், வழிபாடுகளும் சிறு வயதில் இருந்தே பழகிவிடுகிறோம். இன்றும்கூட, பெரியவர்களாக வளர்ந்த பிறகும் கூட அதே அளவு மரியாதையும், வணக்கமும், வழிபாடுகளும் உண்டு. சிலர் வழிபாடுகளை விட்டுவிடுகிறார்கள். சிலர் மொத்தமாகவே எல்லாவற்றையும் விட்டுவிட்டு ‘கடவுளே இல்லை’ என்ற முடிவுக்கும் வந்துவிடுகிறார்கள். இந்த கடவுள் என்பது ஒன்றைக்குறிக்கும் பெயர்ச்சொல் அல்ல, கட+உள் என்ற வினைச்சொல் ஆகும் என்பதை முதலில் நாம் புரிந்து கொள்ள வேண்டும்!

ஆனால் பழகிவிட்டதில், தெய்வீக நிலையை, பேராற்றலை, பேரறறிவை, கடவுள் என்றே அழைக்கிறோம். அப்படி கடவுள் வழிபாடு விட்டவர்கள், எது கடவுள்? என்ற கேள்வியின் தாக்கத்தில், தகுந்த குருவின் வழியாக யோகத்தில் இணைந்து அறிய முயற்சிக்கிறார்கள். தகுதி எல்லா மனிதர்களுக்கும் பொதுவானதாக இருந்தாலும், முயற்சி, ஆர்வம், ஆராய்ச்சி அவர்களை உயர்த்துகிறது.

பொதுவாக, கடவுள் எங்கே இருக்கிறார்? என்ற கேள்வி நமக்குள் எழுவதுண்டு. இதற்கு பதில் சொல்லும்வழியில் பல கதைகள் உண்டு. ‘தூணிலும் இருப்பான், துரும்பிலும் இருப்பான்’ என்ற பழமொழியும் உண்டு.  ‘அவனின்றி ஓர் அணுவும் அசையாது’ என்ற பழமொழியும் உண்டுதான். எனவே, கடவுள் எங்கும், எல்லாமாக, நிறைவாக இருக்கிறார் என்று பொருள்பட சொல்வதே வழக்கம்.

அப்படியானது உண்மை என்றால், நம்மோடும், நம் உடலோடும், உள்ளத்தோடும் இருக்கும் தானே? அது உண்மை என்றால், இதுவும் உண்மைதானே? ஏற்றுக்கொள்ளக்கூடியது தானே? அதைவிட்டு விட்டு, மறந்துவிட்டு, மறுத்துவிட்டு, கோவிலுக்கும், வழிபாட்டு தளங்களுக்கும், காடுகளுக்கும், மலை உச்சிக்கும், இன்னும் எங்கெங்கேயோ, அங்கங்கே போய் தேடி அலைவது ஏன்? இதை என்றாவது சிந்திக்கிறோமா?

அப்படியானால், இதற்கு விடைதான் என்ன? தீர்வு தான் என்ன? என்று கேட்கிறீர்களா? அதற்கும், நம்முடைய சித்தர்கள், ஞானிகள், மகான்கள் தீர்வு தந்திருக்கிறார்கள்! எங்கும் போய் தேடாமல், எங்கே இருக்கிறோமே அங்கெயே தங்கி, யோகத்தில் இணைந்து, குருவிடம் தீட்சையாக கற்று, தவம் செய்து வரவேண்டும். அதாவது ‘கட+உள்’ என்ற நிலைக்கு நாம் தயாராகிறோம் அந்த கடவுளைத் தேடி. அந்த நீண்ட பயணத்தில் நமக்கு கிடைக்கும் விடை அற்புதமானது. அதை நான் தனியாக விளக்கித்தர அவசியமில்லை. நீங்களே உங்களுடைய  ‘கட+உள்’ தேடலில், ஆர்வம், முயற்சி, ஆராய்ச்சி தன்மையில் இருந்தால் வெற்றியோடு கண்டடைவீர்கள் என்பது உறுதி!

வாழ்க வளமுடன்.

-

நன்கொடைகள் (Donate) வழங்க:

UPI: 9442783450@UPI
GPay: 9442783450@okhdfcbank
WhatsApp: 9442783450.wa.qvi@wahdfcbank
Bhim UPI: 9442783450@upi
PhonePe: 9442783450@ybl

Present by: