Why Still Hesitant?

இன்னும் தயக்கம் ஏன்?

ஏன்தவம் ஏன்யோகம் எனக்கேட்டால்

அவ்வை சொன்னது நினைவுகொள்.

தேகம் கொண்டாய் வினைப்பதிவால்!

இதற்கு பதிலாக வள்ளுவன்சொல்வது,

அதுதீர்க்க தவம்யோகம் இரண்டேவழி!

ஆண்டுபல வந்துசென்றும் முயற்சியில்லை

இன்னும் ஏன்தயக்கம் தன்னைதிருத்திட?!

உனக்காக உன்பிள்ளை செய்வானோ?

இல்லையேல் அவன்பிள்ளை செய்வானோ?

நீளுமிந்த பிறவிச்சங்கிலி நீண்டகாலம்!

தனையறிய கிடைத்திடும் முழுமைவீடுபேறு!

உன்னால் உன்சந்ததி சிறப்பாகுமுண்மையே!

விளக்கம்:

நீங்கள் ஏன் யோகம் கற்று தவம் செய்யக்கூடாது? என்று யாரையாவது கேட்டால், அட அதுனால அப்படி என்னய்யா பெருசா வந்துவிட போகிறது? பொழைப்பை பார்த்தால் நாலு காசாவது தேறும் என்று பதிலளிப்பார். பொருள்முதல்வாத உலகில் பணம் தேவையே! ஆனாலும், இந்த பிறவியின் காரணம், வினைப் பதிவுகளாயிற்றே. 

அந்தக் கடனை முதலில் தீர்க்க வேண்டுமே? அதை பிறப்பின் காரணம் வினையே என்று, விளக்கமாக அவ்வைபிராட்டி பாடியுள்ளார். அவ்வினைகளை  தவம், யோகத்தால் வரும் அறம் இவற்றால் அகற்றலாம் என்று திருவள்ளுவர் பாடியுள்ளார். இவர்கள் 2000 ஆண்டுகளுக்கு முன்பே சொன்னதை இப்போதும்கூட கடைபிடிக்காமல் இருந்தால் எப்படி? இன்னும் என்ன தயக்கம்?

நான் செய்யமாட்டேன், எனக்காக என் பிள்ளை செய்தால் செய்யட்டும். இல்லை அவன் மகன் செய்தால் செய்யட்டும் என்று தள்ளிப் போட்டுக் கொண்டே சென்றால், பிறவித்தொடர் நீளுமே அன்றி வாழ்வு முழுமை பெறாது. வாழ்வில் குழப்பங்களும், பிரச்சனைகளும் தொடரும். இப்பிறவியில் ஒருவர் யோகத்தில் தன்னை அறிந்து, இறை உணர்ந்து முழுமை பெற்றால் அவன் வாழ்நாள் சிறக்கும், குடும்பம் சிறக்கும், அவன் பரம்பரையும், தலைமுறையும் சிறக்கும். இத்தகைய பெருமை தரும் யோகத்தை உதாசீனம் செய்து, உலக சிக்கல்களில் மூழ்குவதால் என்ன பயன்? என்று இந்தக்கவிதை உண்மை விளக்குகிறது. 

------