The Meaning of the GOD

 கடவுள் என்பதின் அர்த்தம் என்ன?!

கடவுளே இல்லை என்போரும்

காரிருள் கண்டு பயப்படுவாரோ?

ஆவியோ எதுவோ இருக்குதென்று

ஆயுள் வரையில் திகைத்திருப்பாரோ?

ஆவியே உலகில் இருக்குதென்றால்

மாபெரிய இறையே இருக்குமன்றோ?!

பெரிதினும் பெரிதாய் இருப்பதையும்

இயற்கை நீதிவிளைவை தருவதையும்

இறையென அழைப்பதில் தவறென்ன?

பாமரமக்கள் சிறுவோர் நலம்திருத்த

பார்க்கும் பொருளில் தன்னைக்காணும்

ஆன்மலயம் பழக்கவே இந்தஆலயம்

அனுபவ அறிவில் உயர்ந்தோர்கள்

கடந்துதன் உள்ளே அறிவறிந்தால்

ஊணுடம்பே ஆலயமான உண்மையிதை

உணர்ந்தே வாழ்வில் சிறப்பாரே!

விளக்கம்:

(அரசியலுக்கு அப்பாற்பட்ட தனி நபர்கள் குறித்தே சொல்லப்படுகிறது) 

கடவுள் என்பது கட+உள் என்பதுதானே தவிர பெயர்சொல்லாக எதையும் குறிப்பிடுவதல்ல. எனினும் கடவுள் இல்லை என்பவர்கள், ஆவி, பேய், பிசாசு என்றால் பயப்படுகிறார்கள் என்று சொல்லப்படுகிறது. கீழான இவைகுறித்தே நம்பிக்கை இருக்கும்பொழுது, மேலான இறை நம்பிக்கை தவறாஎன்ன? 

முக்கியமாக இறை வணங்குதல் எல்லா மதங்களிலும் இருக்கிறதுதானே?! அந்த வணங்குதல் என்பது, ஒரு மனிதனுக்கு, தன்னை உணர நெறிப்படுத்தும் செய்கைதானே தவிர வேறில்லை. 

மேலும், ஆலயம் என்பது ஆன்மா+லயம் ஆகும். சிறியவர்களும், படிப்பறிவில்லாத பாமரனும் அங்கே சென்று வணங்குவதின் மூலம் ஆன்மலயம் பெற்று, அங்கே தனக்குள் இறை உணர பழகுகிறான். அவர்கள் ஆலய வழிபாட்டில் பழகி, தன்னை அறிய முற்படவேண்டும், அவர்களுக்காகவே கட உள் என்று சொல்லப்பட்டது.  இந்த விளக்கங்களையே இக்கவிதை தெளிவாக உணர்த்துகிறது. 

வாழ்க வளமுடன்.

-----

Thanks to photos: Google and Copyrights to it's owners