Problem and Difficulty

 பிரச்சனையும் சிக்கலும்

எல்லாம் இருப்பவருக்கும் பிரச்சனை

எதுவுமே இல்லாதவருக்கும் பிரச்சனை

எங்கே தவரென்றே யோசித்தால்

எண்ணமும் செயல்பாடே என்றாகும்!

எனக்கேன் இப்படிஅப்படி நிகழ்ந்தது

என்றே தினம்சிந்திக்க தெளிவாகும்.

எதனால் காரணம் அறிந்தேதிருத்த

எந்நாளும் திருந்தவிழிப்பு உண்டாகும்

ஏற்போம் அதுவரை இந்தபிரச்சனையை

ஏந்தியே தீர்த்தல் இயற்கைசட்டம்!

விளக்கம்:

வாழும் மனிதர்களுக்கு, அவர்கள் எந்த நிலையில் இருந்தாலும் பிரச்சனைகள் இருக்கின்றன. படித்தவரானலும், படிக்காதவரானாலும் பிரச்சனைகளை சந்திக்கிறார்கள். எல்லாமே இருந்தும், எதுவுமே இல்லாமலும் பிரச்சனைகள் எழுகின்றன. ஒன்றை தீர்த்தால் மற்றொன்றும் வந்துவிடுகிறது. ஆகவே எப்போதுமே ஒரு பிரச்சனையில் சிக்கித் தவிக்கிறார்கள்.

பிரச்சனை இல்லாதோர் யார் என்று கேட்டால், நான் என்று கை உயர்த்த யாருமே இல்லை எனலாம். இந்த பிரச்சனைகளுக்கு மூலகாரணம், தவறு என்ன? ஒவ்வொரு மனிதரின் எண்ணமும், அதனோடு எழுந்த செயலுமே ஆகும். 

ஒரு பிரச்சனை ஏன் எழுகிறது? எதனால் என்னை பாதிக்கிறது என்று சிந்திக்க வேண்டும். ஒரு நாளின் ஓய்வு நேரத்தில், தூங்குவதற்கு முன் அப்படி சிந்திக்கலாம். அந்தவகையில் அதன் காரணம் உணர்ந்தால், அடுத்தமுறை அப்படியான பிரச்சனை எழாத விழிப்புணர்வில் செயல் செய்யலாம். படிப்படியாக எல்லா பிரச்சனைகளில் விளக்கம் பெறலாம்.

அதுவரை, ஏற்கனவே இருக்கக்கூடிய பிரச்சனைகளை நாம் ஏற்றுத்தான் தீர்க்க வேண்டும். அதிலிருந்து தப்பிக்க முடியாது. அப்படி தப்பிப்பதே மற்றொரு துணைப் பிரச்சனையை உருவாக்கும். இது இயற்கையின் செயல் விளைவு நீதி சட்டம் என்று புரிந்துகொள்க என்று, இக்கவிதை விளக்கம் அளிக்கிறது.

வாழ்க வளமுடன்

-----

Present by:

Thanks to Image by: internet source