Who is Guru?!

குரு என்பவர் யார்?

காவிதாடி முண்டாசு 

கழுத்தில் மாலைநகை 

கருத்தில் நடிக்கமௌனம் 

காசுபணம் காமத்தை 

கலைத்தவன்போல் புன்சிரிப்பு

காணும் தோற்றமாயை,

கமண்டலமும், கைத்தடியும்

காணாமல் போயிற்று!

கற்றுத்தேர்ந்த ஏமாற்று.

கவனம்கொண்டு விலகிநில்!

கால்பிடித்து கதறுதல்விடு!

கருத்தாய் சிந்தனைசெய்!

இருப்பவரெல்லாம் குருவல்ல

குருஎல்லாம் இப்படியிருப்பவருமல்ல!.

விளக்கம்: குருவைப்போன்ற தோற்றத்தில் இருப்பவரை விட்டு விலகியிருக்க வேண்டும் என்பதற்கான கவிதை!

-------

தனக்கென்று இருந்ததையெல்லாம்

தரணிக்கேதந்த கொடையாளனை,

இயற்கையாய் இறையாய் அறிவாய்

உண்மை அறிந்தவரே குருவாம்!

விளக்கம்: இறையானது, தனக்கென்று ஒன்றும் வைத்துக்கொள்ளாமல், படைத்த எல்லாவற்றையும் உயிர்களுக்கு அளித்துவிட்டு, தானும் அந்த உயிருக்குள் அறிவாக நின்று கொண்டது. இறைவனை பாமரன் என்றும் சொல்லுவார்கள். இந்த உண்மையை அறிந்தவரே குரு.

---------

குருவின் நோக்கம்

உன்னை தேற்றுதல்

உனக்கு கடமை

வினைகளை போக்குதல் - தவிர

கொடுக்கல் வாங்கல் ஏதுமில்லை 

குருவுக்கும் உனக்கும்.

விளக்கம்: இறைவிளக்கம் வேண்டி நிற்பவருக்கும், குருவுக்கும் இடையே எந்த வித வணிகமும் தேவையில்லை. வேதாத்திரி மகரிசி அவர்கள், “ எனக்கு குரு காணிக்கையாக உங்களுடைய வேண்டாத வழக்க பழக்கங்களை கொடுத்துவிடுங்கள்” என்றுதான் கேட்டிருக்கிறார். 

அக்காலம் முதற்கொண்டு, இக்காலங்கள் வரை, குறுகிய காலத்தில் புகழ்பெற, சம்பாதிக்க, எல்லாம் அனுபவிக்கவே குரு போல வேடதாரிகள் வந்துகொண்டே இருக்கிறார்கள்.  மக்களின், அரசின் பிடியில் சிக்கிக்கொண்டுதான் இருக்கிறார்கள். எனினும் குறுக்குவழி குரு மாறுவதாக இல்லை. 

நாம் தான் “நல்ல குரு” தேடலின் மூலம் மாற்றிக்கொள்ள வேண்டும்

வாழ்க வளமுடன்.